Рўзиқул Бердиев: "Яхшигина қаршиликка учрадик"

Суперлиганинг 12-турида “Насаф” ўз майдонида “Навбаҳор”ни қабул қилди ва Драган Чераннинг ягона голи эвазига муҳим ғалабани қўлга киритди. Учрашувдан кейин мезбонлар бош мураббийи Рўзиқул Бердиев баҳс ҳақида гапирди ва саволларга жавоб қайтарди.

- Барчани ғалаба билан табриклайман. Яхшигина қаршиликка учрадик. Рақиб яхши ҳимояланди. Бизга кўп вазият яратишга имкон бермади. Шунга қарамасдан йигитлар бугунги ғалабани ўйлаб майдонда охиригача ҳаракат қилишди. Биз рақибни хато қилишга мажбур қилдик ва буни кутдик. Учрашувда муҳим уч очкони қўлга киритдик. Тўғри, тепм ва тезлик юқори бўлмади. Бундай иссиқда тезкор ўйин кўрсатиш ҳам қийин. Шунга қарамай, натижа учун ўйналадиган ўйин эди. Кимдир гол урса, ўша жамоа уч очкони қўлга киритиши мумкин эди ва биз бундан фойдаландик.

- Рубин Хебай нега кам ўйнаяпти?

- Чунки Хусайн яхшироқ ҳолатда. Шу боис Норчаевга кўпроқ имконият беряпмиз. Тўғри, Хусайн бугун гол урмагандир, аммо меҳнати билан жамоага ёрдам берди. Хебай ҳам бугунги учрашувга менимча яхши қўшилди. Агар тепган зарбаси гол бўлганида турни энг чиройли голларидан бири бўларди.

- Терма жамоадан қайтган футболчиларни ҳолати қандай?

- Ҳар доим таъсир қилган. Чунки у ерда бошқа машғулотлар, бизда эса бошқа машғулотлар олиб борилади. Ҳолати ҳар хил бўлади. Шунинг учун Акмал Мозговой ҳаракат қилди, аммо биз кутган ўйинни кўрсата олмади. Шу боис баъзида бу нарса йигитларга таъсир қилади. Шунга қарамасдан уларни тажрибасига суяниб, ўйинга қўйдик.

- Акмал кейинги пайтларда жанжалкаш бўлиб қоляпти. Уни тезроқ уйлантирасизми?

 - Гаплашамиз. Ё уйлантириш керак, у суҳбат олиб бориш керак (кулади). Хиссиётга берилади, қизиққон. Аммо ўзини назорат қилиши керак. Чунки кераксиз жойда карточка олиб жамоани ёмон аҳволда қолдириши мумкин.  

- Нима учун “Насаф” рақиб жарима майдони ичида гол уришга ҳаракат қилади? Англия ёки бошқа грандларга ўхшаб узоқдан гол урмайди? Бу тактикангизми ёки футболчилар таваккал қилишмайдими?

- Узоқдан тепинглар деб кўрсатма берамиз. Англия ва ўзбек футболини таққосламанг. Баъзида ўйинчилар буни ўзларига олишга жазм қилмайди. Кўп учрашувларда узоқ масофадан гол ҳам урдик. Боя айтиб ўтдим, “Навбаҳор” яхши ҳимояланди. Бешта бўлиб ҳимояланганда кўп вазият кутиш ҳам шарт эмас. Бундай жамоаларга қарши битта вазиятдан фойдаланиш ва режасини бузиш лозим. Шунинг учун биз сабр қилиб кутишимиз керак эди ва бунга эришдик.

- Шерзод Насруллаевни жароҳати бор экан...

- Шерзод ўйиндан келди. Биз билан кўп машғулот ўтказмади. Енгил жароҳати борлиги учун таваккал қилмадик. Уни ҳам йўқлиги жамоамиз ўйинига таъсир қиляпти. Ўйлайманки, кейинги учрашувда ёрдами тегади.