Садио Мане: "Мен буни финални кўришни истаган инсонлар учун қилдим"

Сенегал терма жамоаси сардори Садио Мане финалдаги вазият ҳақида гапирди.

Кеча тунда Африка Миллатлар кубогининг финал учрашуви бўлиб ўтди. Мезбон Марокаш терма жамоаси ва Сенегал мусобақа чемпионлиги учун майдонда жанг қилди. Учрашувнинг асосий вақтига қўшиб берилган дақиқаларда сенегалликлар гол уриб ҳисобни очганди. Бироқ бош ҳакам футболчи зарба беришидан аввал қўполлик ишлатган деб топиб, голни бекор қилди. Орадан 4 дақиқа ўтгач, рефери Сенегал футболчиси ўз жарима майдони ичида қўполлик ишлатгани учун пенальти белгилади. Шундан сўнг учрашувнинг энг қизиқарли қисми бошланди. Сенегал терма жамоаси мураббийи шогирдларидан майдонни тарк этишни ва учрашувни давом эттирмасликни талаб қилди. Шундан сўнг жамоа аъзолари стадионни тарк этди. Бироқ жамоа сардори Садио Мане майдонда қолиб вазият ўз изига тушишини кутди. Бироздан сўнг Мане жамоадошларини қайта майдонга олиб чиқди ва учрашув давом этишини таъминлади. 11 метрли жарима зарбасини тепиш учун тўп олдига яқинлашган "Реал Мадрид" футболчиси Браим Диас паненка услубида зарба берди, бироқ Эдуард Менди тўпни ушлаб олиб, учрашувни қўшимча бўлимлар орқали давом этишига ҳисса қўшди. Экстра-таймларнинг 4-дақиқасида Папа Гейе гол уриб Сенегални ҳисобда олдинга олиб чиқди. Бу гол ўйин якунига қадар ягоналигини сақлаб қолди ва "Африка шерлари" ўз тарихларида иккинчи бор қитъа чемпионлигини тантана қилди. 

Учрашув якунлаганидан сўнг журналистларнинг "Нега бундай қилдинг "деган саволига Садио Мане қуйидагича жавоб берди.

"Ҳакамнинг хато қилишга ҳаққи бор, биз эса ўзимизни бундай тутмаслигимиз керак. Аммо энг муҳими, мен буни бутун дунё бўйлаб финални томоша қилишни истаган инсонлар учун қилдим", - деди Мане.

Маълумот учун, Садио Мане мусобақанинг энг яхши футболчиси деб топилди.