Салоҳ АПЛда яна бир рекордни такрорлади

"Ливерпуль" ҳужумчиси Муҳаммад Салоҳ февраль ойи якунларига кўра Англия премьер-лигасининг энг яхши футболчиси деб топилди. Бу ҳақда лига матбуот хизмати маълум қилди.

Таъкидланишича, Салоҳ ушбу мукофотни еттинчи маротаба қўлга киритди. Ушбу кўрсаткич бўйича у АПЛ рекордини такрорлаб, "Тоттенхэм"нинг собиқ ҳужумчиси Харри Кейн ва "Манчестер Сити"нинг собиқ форварди Серхио Агуэро билан тенглашди.

Эслатиб ўтамиз, февраль ойида 32 ёшли мисрлик футболчи АПЛнинг олтита ўйинида иштирок этиб, олтита гол урди ва тўртта голли узатмани ўз ҳисобига ёздириб қўйди. "Ливерпуль" 29 та ўйиндан сўнг 70 очко тўплаб, лига турнир жадвалида пешқадамлик қилмоқда.