Салоҳни ўрнини биттада босадиган ўйинчи “Ливерпуль”га юз миллион еврога тушяпти

“Ливерпуль” жамоанинг охирги йиллардаги энг зўр тўпурари Муҳаммад Салоҳнинг ўрнини босадиган ҳужумчи олиш учун катта харажат қилишига тўғри келмоқда.

Германиянинг “РБ Лейпциг” клуби энди “Ливерпуль” жиддий қизиқаётган вингер Ян Диоманде учун 100 миллион евродан ортиқ маблағ талаб қилмоқда.

Бу ҳақда журналист Филипп Хайнц X ижтимоий тармоғида хабар берди.

Манбага кўра, Бундеслига клуби энди футболчини сотиш орқали молиявий ҳолатини яхшилашга эҳтиёж сезмаяпти.

Бу ҳолат жамоанинг келаси мавсум учун УЕФА Чемпионлар лигасига йўлланма олишга яқинлиги билан боғлиқ. Бу эса турнирда иштирок учун бериладиган тўловлар ҳисобига клуб бюджетини тўлдириш имконини беради. Чемпионат тугашига тўрт тур қолган бир пайтда “РБ Лейпциг” 59 очко билан учинчи ўринда бормоқда.

Бундан ташқари, “Лейпциг” Диоманде билан шартномани қайта кўриб чиқиш ва унинг маошини оширишни режалаштирмоқда. Клуб ивуарлик футболчини яна камида бир мавсум – 2027 йил ёзигача сақлаб қолишни истамоқда.

Бироқ Диоманде мутлақо сотилмайдиган футболчи ҳисобланмайди, барчаси трансфер таклифининг суммасига боғлиқ бўлиши таъкидланди.