Самвел Бабаян: "Бу йил осон ўйинлар бўлмайди"

Ўзбекистон Кубогининг “Н” гуруҳидаги марказий тўқнашув  сифатида эътироф этилган “Насаф” – “Навбаҳор” баҳсида меҳмонлар 0:1 ҳисобида ғалаба қозонди. Учрашувдан кейин наманганликлар устози Самвел Бабаян фикрларини билдириб ўтди.

- Биринчи навбатда “Навбаҳор” ишқибозларини ғалаба билан табриклайман. “Насаф” билан ўйин у хоҳ чемпионат бўладими ёки Кубок бўладими, доимо яхши даражада ўтади. “Насаф” ҳам яхши ўйин намойиш этади. Рақибга ҳам ўйнаш имкониятини беради. Биз бугун чемпионатдаги энг жамоавий ўйинимизни намойиш этдик. Учрашув бошидан охирги сонияларигача ўйинни назорат қилдик, бу ҳужумда бўлсин, ҳимояда бўлсин. Йигитларга миннатдорчилик билдираман. Улар юқори савияда ҳақиқий профессионал тарзда ўйин қўрсатишди. Ўз позицияларида яққол устунликларини намойиш этиб, ғалабага муносиб ўйин кўрсатишди. Агар Жокич ажойиб имкониятдан фойдаланганида баҳсни эртароқ ҳал қилиб, бундай ажиотажга йўл қўймаган бўлардик. Ўткир Юсуповдан ҳам миннатдорман. У бугун яхши ўйин намойиш этди. Яна бир бор таъкидлайман: уни терма жамоамизнинг энг лидер дарвозабонларидан бири, деб биламан. Биз учун қайғурган инсонларга раҳмат айтаман. Мавсумни бироз қийин бошладик. Ҳар бир жамоа очко олиш учун курашмоқда. Жамоага ва мураббийлар штабига ишонч билдираётган инсонлардан ҳам миннатдорман. “Навбаҳор” бугун сифатли ўйин намойиш этиб, ғалабага хақли эришди.

- “Навбаҳор”га чемпионатда чемпион бўлиш осонроқми ёки Кубокда Кубокни ютишми?

- Менимча, бу йил осон ўйин бўлмайди. Чемпионат ёки Кубок доирасида бўладими, оғир кечади. Умуман олганда, қуръа тақдирига кўра бу гуруҳда ўтган йилги финалчилар, ярим финалчиларни рўбаро қилди. Жиддий гуруҳ. Биз Кубок ёки чемионат деб ўйинларни ажратмаймиз. Ҳамма ўйинлар биз учун муҳим. Бу йил ҳамма ўйинлар қийин ўтади.

- Бунгача Игорь Голбан жамоага кераклигини, ҳимояда камчиликлар бўлаётганини таъкидлагандингиз. Бугун мудофаа чизиғи қандай ўйнади? Камчиликлар бўлмадими?

- Игорь бугун 20 дақиқа ўйнади. У жамоага қўшилганидан сўнг “Насаф” ҳимояси анча ишончли ҳаракатланяпти. Ҳимоядаги якка курашларда фаол бўлади. Менимча, Голбан “Насаф”нинг ҳимоясида муҳим ўрин эгаллайди. Биз уни олиб қолмоқчи эдик. Лекин бу ўзининг қарори, ҳурматга сазовор яхши инсон. Дўстона алоқаларимиз сақланиб қолган. Икки ярим мавсумни бирга ўтказдик. Жамоага жуда катта ёрдам берди. Игорга яхши ўйин намойиш этишини тилайман, фақат “Навбаҳор” билан ўйинларда эмас.