Самвел Бабаян: Ҳолис айтадиган бўлсак, ғалаба қозонишимиз керак эди

Суперлиганинг 11-туридан ўрин олган "Пахтакор" - "Навбаҳор" учрашувида томонлар дурангга имзо чекди. 

Ўйинда бир нечта вазиятлар бўлишига қарамасдан дарвозалар ишғол қилинмади. 

Шу тариқа, наманганликлар турнир жадвалида иккинчи, "Пахтакор" эса 6-ўринга жойлашди. 

Мазкур беллашувдан сўнг ҳар икки жамоа бош мураббийлари иштирокида матубот анжумани бўлиб ўтди. Қуйида Самвел Бабаяннинг фикрлари билан танишиб чиқишингиз мумкин. 

- Авваламбор, ҳаммани Қурбон Ҳайити билан табриклайман. Ўйинга келсак, биз мазкур баҳсда анча яхши тайёрлангандик. Осон бўлмаслигини билардик. "Пахтакор" таркибида яхши футболчилар бор. Биз кучсиз нуқталаримизни билардик. Биринчи таймда сифатли вазиятлар яратдик ва ўйинда доминантлик қилдик. Афсуски, яққол голли вазиятлардан фойдалана олмадик. Иккинчи таймда эса прессинг яхши ишламади ва рақиб қарши кўп бора қарши ҳужумларга ўтиб кетди. Ҳолис айтадиган бўлсак, бугун биз ғалаба қозонишимиз керак эди. Афсуски, бу содир бўлмади.

 Жамоангиз икки хил тайм ўтказди ва термага чақирилган футболчилар чарчаб қолишмади, аммо бошқа ўйинчиларда чарчоқ аломатлари сезилди. Бунинг сабаби нимада?

- Бугун ҳаво анча иссиқ эди. Бунга ҳар қандай инсон турли реакция беради. Терма жамоа йиғини боис тўлиқ таркиб билан ўйнай олмадик.

- "Навбаҳор" xG бўйича энг зўри, аммо голлар оз. Нима учун?

- Тўп дарвозага кирмаётганини иккита жиҳат билан боғласа бўлади. Дастлабкиси машғулотларда кўпроқ меҳнат қилиш ва биз ушбу вазифани яхши бажаряпмиз. Муҳим баҳсларда ўз маҳорати эвазига фарқни юзага келтирадиган футболчилар мавжуд. Бизга шундай футболчилар етишмаяпти. Устунлик доим биз томонда, аммо буни ҳисобда исботлашимиз ҳам лозим. Дуранг қайд этилган учрашувларда биз вақт чўзмаяпмиз ва фақат ҳужум қиляпмиз. Бу бизнинг услуб. Термага беш нафар футболчи йўл олди. Шу сабабли, тўлиқ такрибда деярли машғулот ўтказа олмадик. 

- Дуранглар жуда кўп содир бўлаётганига сабаб нима?

- Ҳар бир беллашувда ғалаба қозонишни истаймиз. Дуранг бўлган учрашувларимизда биз ғалабага ҳақли эдик. Шунчаки, омадимиз келмади.

- Жамоангиз сафида аксар футболчилар термага чақирилгани сизга қай даражада муаммолар келтириб чиқаряпти?

- Мен уларни ҳеч қачон танқид қилмайман. Сабаби, булар менинг ўзимнинг ҳам бошимдан ўтган. Термага йўл олганларнинг барчасида ҳам вазият бир хил эмас. Ҳамробеков тўлиқ иккита ўйинда ҳаракат қилган бўлса, Сайфиев битта учрашувда иштирок этди. Искандеров эса атиги 20 дақиқа ўйнади. Бу жиҳат бизга муаммо туғдирди. 

- Кейинги учрашувлар ҳақида гапириб ўтсангиз?

- Об-ҳаво иссиқлиги ҳам бизга таъсир ўтказмоқда ва бундай шароитда тезкор футбол кўрсатиш бироз мушкул. Биз ҳужумкор футбол ўйнашни давом эттирамиз. Қарши ҳужумларга таяниш биз учун эмас. Ўйинимиз мухлисларга ёқиши учун ҳаракат қиламиз. Мавсумни яхши бошламадик, аммо вазиятни тўғриладик. Даврани чиройли якунлаш бизнинг вазифамиз ҳисобланади.

- Ўтган мавсумларда ёрқин ўйин намойиш этган Ҳақназарий жамоангизга қўшилиб кета олмаётгандек.  У "Навбаҳор"да ўзини топа олмаяптими?

- Ҳамма ҳам "Навбаҳор"га қўшилиб кета олмайди. "Навбаҳор" сафида тўп тепиш - катта босим. "Лочинлар" ўз олдида катта мақсадлар қўяди. Ҳақназарий мавсум аввалида бир нечта учрашувни бошланғич таркибда бошлади. Кейин эса у икки маротаба жароҳат олди. Соғлиғи билан бўлаётган муаммолар сабабли, у жамоага қўшилиб кета олмаяпти. Ҳақназарий қандай даражадаги футболчи эканини биламиз. Шундай бўлса-да, у жамоага киришиб кета олмаяпти. Бунга бошқа жиҳатлар ҳам таъсир ўтказаётган бўлиши мумкин.