Самвел Бабаян: "Керакли натижани қўлга киритиб, гуруҳдан чиқишимиз керак"

Осиё Чемпионлар лигасининг гуруҳ босқичи сўнгги 6-турида “Навбаҳор” Ҳиндистонда “Мумбай Сити” билан ўйнайди. Учрашув олдидан ташкил этилган матбуот анжуманида Самвел Бабаян фикрлари билан ўртоқлашди.

- Биз гуруҳдаги сўнгги ўйинимизни ўтказамиз. Осиё Чемпионлар лигаси доирасидаги учрашув биз учун аҳамиятли ҳисобланади. Бу турнирдаги ҳар бир жамоа яхши ҳаракат қила олади. Учрашувда ҳар ким кўзлаган мақсадига эришишга ҳаракат қилади. “Мумбай Сити”ни ривожланаётган жиддий жамоалардан бири деб ҳисоблайман. У ерда мураббийлар штаби ҳамда тажрибали футболчилар бор. Терма жамоа аъзолари ҳам бу жамоа сафида борлигини биламиз. Бор кучимиз билан курашиб, керакли натижани қўлга киритишга интиламиз.

Шуни айтишим керакки, икки нафар ўйинчимиз дисквалификация қилинган. Ўзимизда “Мумбай Сити”га қарши ўйнаганмиз ва ўшанда бу яхши жамоа эканлигига гувоҳ бўлганмиз. Бизга қарши жиддий қаршилик кўрсатганди. Футболда ўзига хос фалсафаси ва бошқалардан ажралиб турадиган ўйин сифати бор. Бизга қарши учрашувда сифатли футбол кўрсатишган. Саудияда ҳам иссиқ ва нам ҳавода ўйнадик. Бу ердаги об-ҳавога ҳам мослашиб, адаптация жараёнини яхши ўтказишимиз керак деб ўйлайман. Нима десам бўлади? Эртанги учрашув олдидан рақибимизни бир қатор устунликлари ҳам бор. Кучли ўйинчилари ОЧЛнинг ўтган турида майдонга тушишмади. Улар эртанги учрашувга яхшигина тайёргарлик кўришди. Лекин биз кўпроқ ҳужум уюштирамиз ва керакли натижага эришишимиз лозим. Чунки биз гуруҳдан чиқишимиз керак. Шу сабабдан учрашув жамоамиз учун ниҳоятда муҳим. Қизиқарли беллашув бўлади. Айтганимдек, Наманганда уларни ўйинини кўрганмиз. Биз ажойиб ўйин кўрсатишга ҳаракат қиламиз.