Санжар Турсуновдан АГМКнинг кучи нимадалиги, майдон марказидан қандай гол ургани, Миржалол Қосимовнинг ўзига хос жиҳати ва бошқалар ҳақида муносабат

АГМК чемпионатда мағлубиятсиз сериясини давом эттираётган ягона клуб. Бунга таркибда тажрибали футболчиларнинг кўплиги ҳам ўз таъсирини кўрсатмоқда. Албатта, жамоавий ўйин яхши шаклланган. Ўз навбатида, футболчиларнинг индивидуал маҳорати ҳам қўл келмоқда. Санжар Турсунов эса ана шундай ўйинчилар тоифасидан.

Маълумки, 9-турда АГМК “Пахтакор”га қарши марказий ўйинда 2:2 ҳисобида дуранг ўйнади. Аслида эса ўша баҳсда олмалиқликларнинг ғалаба қозониш эҳтимоли юқори эди. Бироқ 0:2 ҳисобини улар сақлаб қола олмадилар. Нима бўлганда ҳам АГМК ютқазгани йўқ. Балки ўша учрашувда Санжар Турсуновнинг йўқлиги ҳам ўз таъсирини кўрсатгандир. Футболчи эса нима учун майдонга тушмаганини шундай изоҳлади:

-  “Пахтакор”га қарши учрашувда мен ўйин қайдномасида эмасдим. Чунки ундан олдин биз “Қўқон-1912”га қарши учрашувда ўйнагандик. Ўша баҳс давомида эса мураббийлардан мени алмаштиришларини сўрагандим. Бироз жароҳатим бор эди. Натижада “Пахтакор” билан беллашувда иштирок эта олмадим.

Мавсум бошидан бери ҳеч кимга ютқазмай келаётган жамоага қойил қолса арзийди. Кўрдингиз, ҳатто амалдаги чемпион – “Пахтакор” ҳам мағлуб эта олмади, қайтанги ўзлари зўрға мағлубиятдан қутулиб қолдилар. Бу эса АГМКнинг салоҳияти юқорилигини кўрсатиб турибди. Барибир Миржалол Қосимов жамоасининг 2-ўринни эгаллаб турган ҳолда мағлубиятсиз одимлаётгани кўпчиликни ёқимли маънода ажаблантираётгани ҳам рост.

-  Биласизми, биз карантиндан олдин ва кейин ўқув-машғулот йиғинларида жуда яхши тайёргарлик кўргандик, - дея ушбу мавзуга қўшимча қилди Турсунов. - Бундай натижа кўрсатаётганимиз бутун жамоа бўлиб бирлаша олганимиз билан боғлиқ. Нафақат футболчилар, балки мураббийлар штаби, шифокорлар, умуман клубдаги барча бир оила сифатида шакллана олган. Шу билан бирга мураббийлар томонидан кўрсатилаётган топшириқларни машғулотларда ва ўйинлар жараёнида тўғри ёндашув асосида бажараётганимиз учун ҳам бугунги кунда мана шундай натижага эришяпмиз.

Дарвоқе, Санжар Турсунов 8-турда қандай гол ургани ёдингизда бўлса керак. У шундай гол урдики, бу нафақат турнинг, балки йилнинг энг чиройли голи бўлишига энди шубҳа қилмасак ҳам бўлар. Тахминан 60-70 метр узоқликдан, майдон марказига етмасдан гол уришнинг ўзи бўладими? Ўша “Қўқон-1912”га қарши учрашувда Турсуновнинг урган голига ҳамма ҳавас қилди. Қизиқ, ўша вазиятда у тўпни таваккал билан тепганмиди ёки ҳаммасини аниқ ҳисоб-китоб қилганмиди? Бунга Санжар шундай деди:

-  “Қўқон-1912” дарвозасига киритган голимга келсак, ўша вазиятда мен дарвозабоннинг олдинга чиқиб кетганини кўрдим. Тўпни эгаллаб олиб зарба бераётганимда 100 фоиз аниқ гол ураман, деб ўйламагандим. Лекин Худога шукрки, ўша ҳолатда олисдан йўллаган зарбам дарвоза тўридан жой олди. Албатта, бундай гол урганимдан сўнг жуда хурсанд бўлдим. Аммо гол урган пайтимда таваккал зарба йўллагандим, деб айтмаган бўлардим. Агарда тўпни эгаллаб олиб дарвозага қарамасдан тепиб юборганимда бу таваккалчилик  бўларди. Мен эса ҳаммасини кўриб туриб, кейин зарба бердим.

Жамоада бош мураббийнинг имзоси ҳам яққол кўриниб турибди. Ниҳоят, бу йил Миржалол Қосимов ўзи истаган жамоани шакллантира олаётгани сезилмоқда. Асосийси, у таркибга ўзи кўришни хоҳлаган футболчиларни йиға олди. Табиийки, Санжар Турсунов ҳам шулар жумласидандир. Қосимовни бошқа мураббийлардан ажралиб турадиган жиҳати нимада? Турсунов эса Миржалол Қўшоқович борасида шундай деди:

-  Ҳамма яхши билади, Миржалол Қўшоқович билан миллий терма жамоада ҳам бирга ишлаганмиз. Шунинг учун АГМКга қўшилганим ҳам бежиз эмас. Албатта, ҳар бир мураббийнинг ўзига яраша плюс ва минус томонлари бўлади. Бундай ҳолат биргина мураббийда эмас, ҳаммада учрайди ва нафақат мутахассисларда, балки футболчиларда ҳам шунақа. Қосимов футболчиларни ўйинга жуда яхши тайёрлашни билади. Ахир ўз вақтида ажойиб футболчи бўлган ва шу боис кўп нарсани билади. Айни пайтда биз босиб ўтаётган йўлни Миржалол Қосимов аллақачон босиб ўтган. Бир сўз билан айтганда, мураббийимизнинг бой тажрибаси бизга ҳам жуда қўл келяпти.

Юқорида Санжар АГМКнинг мағлубиятсиз серияси ҳақида тўхталиб ўтди. Барибир ҳали олдинда ўйинлар кўп. Ўзи айтганидек, ҳаммасини мавсум охирида турнир жадвалига қараб билиб оламиз. Шундай экан, олмалиқликлар ҳозирги барқарорлигини қанчалик сақлаб қола олишаркин? Кўриниб турибдики, клубнинг мақсади жиддий ва совриндорлар қаторидан жой олиш. 

-  Чемпионатимиз энди ўртасига келяпти, олдинда эса ҳали кўп ўйинлар бор. Мавсум давомида эса барча клубларда кўтарилиш ва пасайиш ҳолатлари учраб туради. Биз эса ҳозирда яхши ҳолатдамиз. Мисол учун бир неча йил олдин Англияда “Лестер” чемпион бўлганди. Ўша мавсумда бу клуб бутун чемпионат давомида барқарор ўйин кўрсата олганди. Тўғри, “Лестер”да ҳам ўша мавсумда қандайдир пасайишлар бўлган, аммо у қадар чуқурликка тушиб кетмаган. Бизнинг олдимиздаги вазифа эса шундай: ҳар доим ҳар бир учрашувда ғалаба қозониш асосий мақсадимиз ҳисобланади. Шу билан бирга майдонга тушганда яхши ўйин кўрсатишни мураббийларимиз талаб қилишади. Биз бутун мавсумни иложи борича мана шундай руҳда ўтказмоқчимиз. Кейин эса мавсум тугаганидан сўнг турнир жадвалига қараймиз. Мураббийимиз ҳам ҳамиша олдимизга юксак мақсадларни қўяди. Худо хоҳласа, бу йил яхши натижалар кўрсатиш ниятимиз бор, - деди Турсунов.

Футболда ғалаба билан мағлубиятнинг таъсири яққол билинади. Айниқса, ғалабалар бардавом бўлса, ўз навбатида бу жамоага ҳам ижобий таъсир кўрсатади. Агар мағлубиятлар давом этаверса, бунинг ҳам таъсири сезилади. Айниқса, жамоанинг ички муҳитига турлича акс таъсир қилиши ҳеч гап эмас. Лекин айни пайтда АГМКдаги вазият ҳавас қилса арзигулик даражада. Буни Турсунов ҳам тасдиқлади. 

-  Кўз тегмасин, жамоамизда муҳит жуда ажойиб ҳолатда. Ёшлар катталарни ҳурмат қилишади. Биз ҳам ёш ўйинчиларга ҳурмат билан қараймиз. Шунинг учун жамоамизда қандайдир салбий ҳолатлар учрамайди. Жамоамиздаги барча ўйинчилар фақат позитив руҳида ҳаракат қиламиз. Жамоамизда керак бўлса, ҳамма қувноқ бўлади, керак бўлса барчаси жиддий бўла олади. Бу ҳам бизнинг бир оила эканлигимизни кўрсатиб туради.