Саудия клублари Винисиус учун ҳаракатни давом эттирмоқда

Винисиус Жуниорни Саудия Арабистонига олиб келиш устида иш давом этмоқда.

Журналист Саша Тавольери маълумотига кўра, бир неча кун олдин Саудия лигаси вакиллари футболчининг агентлари билан учрашув ўтказган. Айтилишича, агар у "Реал" билан шартномасини узайтирмаса, бразилиялик трансферга очиқ бўлиши мумкин. Шу билан бирга, футболчининг ўзи музокараларда иштирок этмаган.

"Реал" президенти Флорентино Перес эса Винисиуснинг жамоада қолишини ва янги шартнома имзолашини истамоқда. Томонлар ўртасида музокаралар давом этмоқда, аммо якуний қарор футболчининг ўзига боғлиқ.

Жорий мавсумда Винисиус Ла Лигада 28 та ўйинда иштирок этиб, 11 та гол урди ва 5 та голли узатмага муаллифлик қилди.