Сайриддин Гаффаров хайрия акцияси Тожикистонда ҳам катта акс-садо бермоқда!

Хабарингиз бор, кеча клуб расмий саҳифаси орқали собиқ футболчи Сайриддин Ғаффоровнинг оғир бетобликка дучор бўлиб қолгани ва шу сабабли уни қўллаб-қувватлаш учун хайрия акцияси старт олгани тўғрисида маълумот бергандик.

Қувонарлиси, эҳсонпарвар, саҳоватпеша инсонлар кўплиги боис Сайриддиннинг ҳолатига жим қараб турмаяптилар. Шу билан бирга ушбу хабар Тожикистонда ҳам ўзига яраша реакция келтириб чиқарди.

Негаки, Сайриддин Тожикистон чемпионатининг бир қатор клубларида тўп сургани сабабли маҳаллий жамоалар ва мухлислар Гаффоровга ёрдам кўрсатиш истаги билан чиқмоқдалар.

Айни пайтда “Нефтчи” жамоасида дарвозабонлар мураббийи сифатида фаолият кўрсатиб келаётган тожикистонлик Фарруҳ Бердиев ҳам собиқ ўйинчи ҳақидаги маълумотдан хабар топди. Натижада “Андижон” клуби матбуот хизматига Гаффоров масаласида шундай деди:

- Мен Сайриддин Ғаффоровни яхши танийман. Кўп йиллардан бери биламан. Тожикистон чемпионатида “Равшан” Кулоб, “Хосилот-Фархор”, “РегарТадАЗ”, “Хўжанд” сингари клубларда ўйнаган. Айнан 2014 йилда у билан “Хўжанд” сафида бирга тўп сурганмиз. У ҳар бир ўйнаган клубида етакчи бўлган. Гаффоровга нисбатан ҳам инсон, ҳам футболчи сифатида ҳурматим баланд. У кучли ўйинчи бўлган, чап оёғида кучли зарбасига эга эди. Куни кеча Сайриддинни расмлари ОАВ орқали кўриб жуда ачиндим. Жуда яхши инсон. Бундай касалликка учраганини билмагандик. Сайриддин учун қўлимиздан келган барча ёрдамни аямаймиз. Тожикистонда Ғаффоровни жуда кўплаб мухлислари бор. “Равшан” сафида ОФК Кубогида ҳам тўп сурган. У ерда футболчининг кўплаб дўстлари ҳам бор. Шунинг учун тожикистонлик мухлислар Сайриддинни яхши танийдилар. Ғаффоровга “Нефтчи” жамоаси ҳам қўлидан келганича ўз ёрдамини аямайди. Сайриддин билан тез орада алоқага чиқиб, ҳолидан хабар оламиз.

Рости, Ғаффоровни бундай аҳволда кўриб жуда чиндим. Ўзимиз ҳам футбол ўйнаганмиз. Кўнглим эзилиб кетди ва кўзим жиққа ёшга тўлди. Тожикистонда уни қўллаб-қувватлайдиган мухлислари ниҳоятда кўп. Қаерда ўйнаган бўлса, ўша клуб раҳбарлари ҳамда футболчилари барчаси Сайриддиннинг бугунги ҳолатига бефарқ эмаслар. Биз тожикистонликлар ҳам жим қараб турмаймиз”, - дейди Бердиев “Андижон” матбуот хизматига.

Ҳисоб рақами: 4073 4200 7787 3325 (VISA)

P/S. Тожикистонлик меҳри дарё, саҳий, футбол ва инсон тақдирига бефарқ бўлмаганлар учун: Душанбе сити картасидан Ўзбекистон картасига халқаро пул ўтказмаси.

“Андижон” матбуот хизмати.