Сенегалнинг Африка миллатлар кубоги финалидаги натижаси бекор қилинди

Африка футбол конфедерацияси (CAF) расмий сайтида Сенегал миллий терма жамоасига Марокаш билан бўлган Африка миллатлар кубоги финалидаги учрашув учун техник мағлубият ёзилганини эълон қилди.

2026 йилнинг 18 январида бўлиб ўтган финал учрашувида сенегалликлар мусобақа мезбони бўлган марокашликларни 1:0 ҳисобида мағлубиятга учратган эди.

- Африка футбол конфедерациясининг (CAF) Апелляция кенгаши Африка миллатлар кубоги регламентининг 84-моддасига мувофиқ, Сенегал миллий терма жамоаси 2025 йилги Африка миллатлар кубоги финалида Марокашга қарши ўйинда мағлуб, деб топилишини қарор қилди. Натижада ўйин 3:0 ҳисобида Марокаш Қироллиги футбол федерацияси (FRMF) фойдасига қайд этилди, - дейилади CAF баёнотида.

Эслатиб ўтамиз, ҳал қилувчи ўйинда Сенегал миллий жамоаси 90+8-дақиқада рақиб футболчиси Браим Диасга нисбатан қўлланилган фол учун белгиланган пенальтидан сўнг майдонни тарк этган эди. Учрашув 13 дақиқадан сўнг қайта бошланиб, 1:0 ҳисобида Сенегал ғалабаси билан якунланган эди.