Сенсация: “Барса” серхаражат ўйинчини катта суммага сотмади

“Барселона”да катта маош олаётган Френки де Йонгнинг клубдаги келажаги мавҳум бўлиб турибди. Нидерландиялик футболчи клубнинг янги шартнома бўйича таклифини ҳали қабул қилгани йўқ.

Френки де Йонг атрофидаги вазият Европанинг қатор клублари эътиборини тортмоқда. Каталонияликлар билан яна бир йиллик шартномаси қолган футболчига “Манчестер Юнайтед” оғиз солди.

Манчестерликлар 27 ёшли марказий ярим ҳимоячи учун “Барселона”га 65  миллион евро таклиф қилди. Бироқ каталонияликлар бу таклифни қабул қилмади.

Маълум бўлишича, “Барселона” бош мураббийи Ханс-Дитер Флик нидерландиялик чарм тўп устасини спорт лойиҳасининг муҳим фигураси сифатида ўйнатмоқчи, клуб раҳбарияти эса, ўйинчининг янги битимни имзолашидан умидвор.

Қизиғи шундаки, икки йил муқаддам “Барселона” Френки де Йонгни 90 миллион евро эвазига “Манчестер Юнайтед”га трансфер қилишга кўнган эди. Ўшанда ўйинчининг ўзи Каталониядан кетишдан бош тортган.