Сербиялик футболчи кейинги мавсум ҳам Ўзбекистон чемпионатида ўйнаши мумкин

Бу йилги мавсумда “Қўқон-1912” жамоаси сафида икки нафар сербиялик легионер ҳаракат қилди. Ҳужумчи Филипп Райевац аввал ҳам бу жамоа сафида тўп тепган. Райевац Ўзбекистонда “Бунёдкор”, “Локомотив” жамоаларида ҳам ўйнашга улгурган. Ҳимоячи Иван Йосович эса бу мавсумда илк бор ўзбек клуби шарафини ҳимоя қилди. Бир неча кун аввал, Йосович ҳамда Райевац ўз юртига учиб кетди. “Қўқон-1912” жамоасининг марказий ҳимоячиси бўлган Иван Йосович кетишидан олдин Ўзбекистондаги таассуротлари ҳақида клуб матбуот хизматига қисқача интервью берди.

- Аввало, шундай гўзал юртда бўлиш менга насиб қилганидан хурсандман. Мен Суперлиганинг 24-туридан ўрин олган “Қўқон-1912” – “Локомотив” баҳсида бошимдан жароҳат олдим. Бошим ёрилиб, ўйинни тугата олмай, захирага чиқишга мажбур бўлгандим. Шифокорлар 10-15 кун майдонга чиқа олмаслигимни таъкидлашди. Бу ёқда эса мавсум тугаб бормоқда. Биз пандемия туфайли салкам бир йил оиламиздан йироқда бўлдик. 11 ой уйдан олисда яшаш осон эмас. Албатта, тезроқ уйга қайтишни истадим. Бош мураббий Бахтиёр Ашурматовдан ўйнай олмайдиган бўлсам, уйга рухсат беришини сўрадим. Мураббийимиз мени тўғри тушундилар ҳамда Филипп Райевац иккимизни эртароқ жамоани тарк этишимизга рухсат берди.

Мен Ўзбекистонда бўлганимдан, “Қўқон-1912” жамоаси сафида тўп тепганимдан жуда бахтиёрман. Биз йил давомида аҳил оилага айландик. Ажойиб мавсумни ўтказдик. Жамоа раҳбарияти, мураббийлар, футболчилар ва барча клуб аъзоларига миннатдорлик билдираман. Қўқонда ажойиб мухлислар бор. Бундай фидоий ишқибозлар кўз ўнгида тўп тепиш кишига олам-олам завқ беради. Энди уйга бориб бироз ҳордиқ чиқараман. Менда ўйлаб кўриш учун вақт бор. Насиб қилса, балким келгуси йилда яна Қўқонда кўришармиз. Яна бир бор барчага раҳмат айтаман, – деди Иван Йосович.