Сергей Лушчан: Финалга чиқа олмасак кетишдан қўрқмайман, менда хориждан 5та таклиф бор

“Бунёдкор” – “Локомотив” баҳсидан сўнг Сергей Лушчан қуйидагича фикр билдириб ўтди:

– Ўйин тўғрисида кўп гапириб ўтириш шарт эмас. Биз мағлуб бўлдик, рақиб бугун биздан кучли чиқди. Шуни таъкидлай оламан холос.

Умуман олганда, бу йилги чемпионат ёмон ўтмади. Аммо бундан яхшироқ ўйнашимиз ва янада яхшироқ натижа қайд этишимиз ҳам мумкин эди. Лекин якунда биз 2-поғонадан жой олдик. Демак, таркибимиздаги ижрочилар билан ҳозирча фақат кумуш медалларга эга чиқа олар эканмиз.

Агар янада яхшироқ натижаларга эга чиқишни истасак, таркибга кўпроқ маҳоратлироқ, тажрибалироқ бўлган ўйинчиларни чаиқиришимиз керак.

Яна 3 кундан сўнг кубок доирасида ҳам “Локомотив” билан ўйин ўтказамиз. Агар “Бунёдкор” финалга чиқа олмаса, бу менинг эгаллаб турган ўрнимга таъсир этмайди. Зеро айни пайтда менда хорижнинг 5 та жамоасидан таклиф бор. Шу сабабли вазифамдан озод қилиниш масаласи мени хавотирга солаётгани йўқ, – дейди Лушчан.