Sergey Yuran O‘zbekiston Kubogi finali oldidan nima dedi?

Bu yilgi O‘zbekiston Kubogi finaliga har qachongidan ham qiziqish katta. Boisi, Kubokni qo‘lga kiritish uchun vodiyning ikki jamoasi kurash olib boradi. Anchadan beri Kubok finalida vodiy derbisini ko‘rmagandik. Bu safargisi esa chindan ham boshqacha ruhda o‘tadi.

“Navbahor” – “Andijon” uchrashuviga qiziqish shu qadar kattaki, hatto, boshqa yurtlarda ham ushbu bo‘lajak finalga e’tibor qaratishgan.

Jumladan, Rossiya futbolining tirik afsonalaridan biri Sergey Yuran ham Farg‘onadagi “Istiqlol” stadionida bo‘lib o‘tadigan Kubok finalidan xabardor.

55 yoshli tajribali mutaxassis “Andijon” matbuot xizmatiga bo‘lajak final oldidan quyidagilarni aytdi:

“Finalda katta mas’uliyat bo‘yinga tushadi. Klub bunday paytda muxlislar qarshisida mas’uliyati kattaligini his qiladi. Chunki ishqibozlar faqat g‘alabani kutishadi. Buni o‘yin paytida maydonda ham unutmaslik kerak!

Shuni alohida aytmoqchimanki, finaldagi ikkala jamoaga bellashuvni jarohatlarsiz o‘tkazib olishlarini tilayman! Agar imkon bo‘lganida finalni ko‘rgani borardim”.