Серхио Рамос ҳамма билан хайрлашди

Мексиканинг “Монтеррей” жамоаси ҳимоячиси Серхио Рамос  Мексика лигаси Апертураси ярим финал жавоб ўйинида “Толука”дан 2:3 ҳисобида учралган мағлубиятдан кейин бу клубдан кетишга қарорини эълон қилди.

- Шуниси аниқки, бу менинг Мексикадаги охирги ўйиним эди. Мағлубиятдан биз хафамиз, лекин виждонимиз пок — майдонда бор кучимизни бердик.

Хулоса чиқариш, қайта тикланиш ва бу ҳам футболнинг бир қисми эканини қабул қилиш керак.

Энг катта дард — мухлисларга яна бир финални инъом эта олмаганимиз, чунки улар бунга ҳаммадан кўпроқ лойиқ эдилар. Доимий қўллаб-қувватлаганингиз учун раҳмат. Олға, “Монтеррей”, - деб ёзди Рамос ижтимоий тармоқдаги саҳифасида.

Жавоб учрашувида “Монтеррей” рақибга имкониятни бой берганидан кейин биринчи ўйиндаги минимал ҳисобдаги ғалаба ўз кучини йўқотди ва бу Серхио Рамос жамоасининг кейинги босқичга чиқишига имкон бермади. Мексиканинг амалдаги чемпиони “Толука” умумий ҳисобда финалга чиқди ва ҳал қилувчи баҳсда “Тигрес”га қарши баҳс олиб боради.