“Севинч” ўз сафга уч нафар легионер қўшиб олди (Фото)

“Севинч” ўз таркибини давралар оралиғида кучайтиришга катта эътибор қаратди. Натижада “Насаф” клубининг бош ҳомийси – “Шўртан газ кимё мажмуаси” МЧЖ раҳбариятининг бевосита қўллаб-қувватлаши эвазига ўз таркибига уч нафар легионер футболчини қўшиб олди. Бу ҳақда клуб матбуот хизмати хабар берди.

Булар Дангмеи Грейс, марказий ярим ҳимоячи – Ҳиндистондан, Мумуни Фусеина, ҳужумчи – Ганадан ва Нжолле Алвине Нгонжа, марказий ҳимоячи – Камерундан.

Мумуни Фусеина бунгача Жиззахнинг “Сўғдиёна-W” жамоасида тўп тепган ва ўтган йилги мавсумда чемпионликни расмийлаштирган.

Футболчиларнинг “Насаф” клуби бош директори А. Юсупов ва раҳбарият ходимлар билан расмий учрашуви бўлиб ўтди ва ўзаро шартномалар имзолаш маросими ҳам ўтказилди. Шартномалар имзолангач, футболчиларга рақамлари акс этган футболкалар топширилди.

Легионер футболчилар ҳақида қисқача маълумот билан танишинг.

Исми шарифи: Мумуни Фусейна
Туғилган санаси: 2 апрел 2001 йил
Фуқаролиги: Гана Республикаси
Амплуаси: марказий ҳужумчи
“Севинч” таркибида 7 рақам остида ўйнайди.
Ўйнаган клублари:
2016 – 2018 йиллар – “PEARL PIA LADIES” FC (Гана)
2019 – 2020 йиллар – “AMMAN CLUB” (Иордания)
2020 – 2021 йиллар – “СЎҒДИЁНА-W” (Ўзбекистон)

Турли ёш тоифасидаги Гана аёллар терма жамоасида ҳам тўп тепган. ФИФА томонидан ўтказилган U-17, U-20 ёш тоифасидаги жаҳон мусобақаларида Гана Республикаси шарафини ҳимоя қилган.

Мумуни Фусейна 2021 йилги мавсумда Жиззахнинг “Сўғдиёна-W” жамоасида тўп тепган эди. 21 учрашувда майдонга тушиб, рақиблар дарвозасини 31 марта ишғол этган. У шу йили жами 1875 дақиқа майдонда ҳаракат қилган.

Исми шарифи: Дангмеи Грейс
Туғилган санаси: 5 феврал 1996 йил
Фуқаролиги: Ҳиндистон Республикаси
Амплуаси: марказий ярим ҳимоячи
“Севинч” таркибида 15 рақам остида ўйнайди.
Ўйнаган клублари:
2016-2018 йиллар – “KRYPHSA” клуби футболчиси
2019 йилдан ҳозиргача – “Gokulam Kerala” клубида тўп тепган.

Турли ёш тоифасидаги Ҳиндистон аёллар терма жамоасида ҳам тўп тепган. Ҳозирги пайтда Ҳиндистон аёллар терма жамоаси шарафини ҳимоя қилади.

Исми шарифи: Нжолле Алвине Нгонжа
Туғилган санаси: 9 май 1994 йил
Фуқаролиги: Камерун Республикаси
Амплуаси: ҳимоячи
“Севинч” таркибида 4 рақам остида ўйнайди.
Ўйнаган клублари:
2013-2014 йиллар – “CAIMAN FILLES” клуби футболчиси
2014-2015 йиллар – “PANTHERE GAROUA” клуби футболчиси
2016-2020 йиллар – “DINAMO” Минск клуби футболчиси
2020 йилдан ҳозиргача – “CAIMAN FILLES” клубида тўп тепган.

Нжолле Алвине Нгонжа ҳам турли ёш тоифасидаги Камерун аёллар терма жамоаларида ва миллий аёллар терма жамоаси шарафини ҳам ҳимоя қилган.