Шацких ўйинни қутқариш учун керакли сўзларни топди ёхуд Суперкубок олдидан муҳим ғалаба!

“Андижон" учун мазкур баҳс жуда муҳим аҳамият касб этарди. Бош мураббий Максим Шацких “Бобур арена”да илк бор “Андижон” устози сифатида кўриниш берди.

Охирги пайтлардаги муваффақиятсиз учрашувлардан кейин бу сафар ғалаба сув ва ҳаводек зарур эди. Қолаверса, 27 май куни “Бургутлар”ни Суперкубок ўйини кутаётганди. Ўртага соврин тикилган учрашувга албатта ғалаба қозониб, яхши кайфиятда, руҳиятни кўтарган ҳолда  етиб бориш муҳим ҳисобланарди. Бироқ Максим Шацких олдида муаммолар ҳам йўқ эмасди. Жумладан, Олег Зотеев, Лука Ускокович, Фарҳод Соҳибжонов, Абубакир Ашуров каби футболчиларда жароҳат бор эди. Натижада ўйинчиларнинг позицияларида мажбурий ўзгаришлар кузатилди.

Аксига олиб, “Сурхон”га қарши ўйин мезбонлар учун яхши бошланмади. Беллашувнинг 5-дақиқасидаёқ улар ўз дарвозасидан тўп ўтказиб юбордилар. Жамоа ўзига келиб олгунича бироз вақт керак бўлди. Барибир асосий воқеалар иккинчи бўлимда юз берди. Танаффус пайтида Максим Александрович футболчиларга жуда керакли сўзларни топиб айта олгани иккинчи бўлим бошиданоқ сезилди. Натижада 48 ва 54-дақиқаларда Бектемир Абдуманнонов билан Дониёр Абдуманнопов рақиб дарвозасини ишғол қилдилар. Биринчи голда Дониёр Бектемирга голли пас узатди. Иккинчисида эса Абдуманнопов майдон марказидан бир ўзи ёриб кирди ва жарима майдони ичига кирмасдан жуда чиройли гол муаллифига айланди.

Шундай қилиб, иккинчи бўлимни даҳшатли бошлаган майдон эгалари жонажон мухлислари қаршисида ниҳоят ғалаба қозониб, мағлубиятли сериясига барҳам бера олдилар.

Ўйиндан кейин “Ультрас Бургут” бошчилигида футболчилар марказда доира шаклида ўзгача равишда ғалабани ўз суюклилари билан биргаликда нишонладилар. Бу ғалаба Суперкубок олдидан жуда муҳим эди.

Энди навбат 27 май куни “Бунёдкор” стадионида “Насаф”га қарши ўтадиган совринли ўйинга! 

“Андижон” – “Сурхон” – 2:1 (0:1).

23 май. Андижон. “Бобур арена” стадиони. 7900 томошабин.

Ҳакамлар: Абдурашид Худойберганов, Руслан Серазетдинов, Бахтиёрхўжа Шавкатов

Захира ҳаками: Ботир Отабоев

ВАР: Фирдавс Норсафаров

АВАР: Санжар Шоюсупов

Назоратчи: Бахтиёр Тоғаев

Комиссар: Владимир Назаров

“Андижон”: Валижон Раҳимов, Ислом Маматказин, Абдулвоҳид Ғуломов, Искандар Шойқулов, Абдураҳмон Комилов, Алтин Крезиу, Илҳом Абдуғаниев (Дамир Темиров, 85), Бектемир Абдуманнонов (Сардор Азимов, 85), Дониёр Абдуманнопов, Рустам Турдимуродов (Муҳаммадкарим Тоиров, 70), Ислам Машуков (Усмонали Исмоналиев, 77).

“Сурхон”: Артём Потапов, Суннат Ҳамиджонов, Нодирхон Неъматхонов, Бекзод Шамсиев, Достон Турсунов, Шерзод Комилов (Суннатилла Поёнов, 62), Бехруз Шайдулов, Кирил Колесниченко (Абдуғофур Ҳайдаров, 83), Асилбек Жумаев (Жаҳонгир Абдусаломов, 89), Муҳаммадюсуф Мирқодиров (Диёр Рамазонов, 83), Муҳаммад-Али Абдураҳмонов (Нодир Абдуҳолиқов, 62).

Голлар: Достон Турсунов, 5 – 0:1. Бектемир Абдуманнонов, 48 – 1:1. Дониёр Абдуманнопов, 54 – 2:1.

Огоҳлантиришлар: Абдураҳмон Комилов, 61. Илҳом Абдуғаниев, 81.