Шодиёр Мелиқўзиевдан ишончли ғалаба

Тошкентдаги "Ҳумо арена"да бокс бўйича эркаклар ўртасида жаҳон чемпионати бўлиб ўтмоқда.

Бугун 18:00да (-48 кг) Шодиёр Мелиқўзиев непаллик Рабин Тапа билан куч синашади. 

Шодиёр Мелиқўзиев ва Рабин Тапа рингга чиқиб келмоқда. Ҳамюртимиз кўк либосда, унинг рақиби қизил формада ҳаракат қилади.

Биринчи раунд бошланди.

Шодиёр илк сониялардан босим қилмоқда. Яккалик зарбалари беришга муваффақ бўлди ҳамюртимиз. Рабин Тапа ҳам қорин қисмига яккалик зарбалари бермоқда. Шодиёр Мелиқўзиев Тапани мувозанатдан чиқаришга ҳаракат қиляпти. Вакилимиз ринг марказини эгаллади. Тапа ҳимояланишга мажбур. Чунки Мелиқўзиев уни тинмай таъқиб қиляпти. Шодиёр асосан яккалик зарбалари билан ҳужумга ўтиб, иккилик ва учлик зарбалари йўллашга эришмоқда.

Биринчи раунд якунланди. Ҳакамлар Шодиёрнинг устунлигини қайд этишди 5:0.

Иккинчи раунд бошланди.

Шодиёр чап қўли билан кучли зарбалар бермоқда. Рақиб чуқур ҳимояга ўтяпти. Тапа бир нечта жеб ва юз қисмига зарбаларни қабул қилиб олди. Непаллик боксчи бир неча бор зарбалар кучидан мувозанатни йўқотмоқда. Ҳамюртимиз иккилик зарбасини ҳам ўтказа олди. Икки боксчининг айрим зарбалари ҳавога учишни бошлади.

Иккинчи раунд тугади. Ҳакамлар Шодиёрнинг устунлигини қайд этишди 5:0.

Учинчи раунд бошланди.

Мелиқўзиев рингда рақибини қувлаб юриб урмоқда. Икки раунддаги устунлик вакилимизни янада олдинга ундамоқда. Қарши ҳужумда ҳамюртимиз ҳам юз қисмига зарбаларни ўтказиб юбормоқда. Яхшиямки рақиби зарбалар сериясини улаб кета олмаяпти.

Тапа кўплаб зарбалар ўтказиб юборган бўлса ҳам ўзида куч топа олмоқда. Шодиёр эса жангни нокаут билан якунлаш мақсадида тинмай ҳаракат қиляпти. Ҳамюртимиз томонидан зарбалар серияси. 

Учинчи раунд якунланди. Бу гал ҳам ҳакамлар 5:0 ҳисобини қайд этишди. Умумий ҳисоб 5:0 Шодиёрнинг ишончли ғалабаси.