Шомуродов билан ўйнаган футболчи Португалиядан иш топди

Англия терма жамоасининг собиқ ҳимоячиси Крис Смоллинг Португалиянинг «Порту» клуби билан 2026/27 йилги мавсум охиригача шартнома имзолади. Келишувда шартномани яна бир йилга узайтириш имконияти ҳам назарда тутилган. Бу ҳақда клубнинг расмий сайти хабар берди.

36 ёшли футболчи Португаалия грандига эркин агент сифатида келиб қўшилди. Смоллинг профессионал фаолиятини «Фулхэм» таркибида бошлаган, 2010 йилда эса «Манчестер Юнайтед» сафига ўтган. Тўққиз мавсум давомида у манкунианликлар таркибида 324 та ўйин ўтказиб, 18 та гол урган. Шу давр мобайнида икки бор Англия чемпиони бўлган, Европа Лигаси, Англия кубоги, Англия лига кубоги ва уч марта Суперкубокни қўлга киритган.

2019 йилда Смоллинг Италияга йўл олиб, «Рома» клубига ўтди ва у ерда беш мавсум тўп сурди. Римликлар билан биргаликда 2021/22 йилги мавсумда Конференциялар Лигасида ғолиб чиқди ва турнирнинг рамзий терма жамоасига киритилди. Сўнгги икки мавсумни эса англиялик ҳимоячи Саудия Арабистонининг «Ал-Файха» клубида ўтказди.

Крис Смоллинг Англия терма жамоаси сафида 31 та ўйин ўтказган. У Жаҳон чемпионати-2014 ва Евро-2016 мусобақаларида майдонга тушган.