Shomurodov “Bolonya” bilan necha yillik shartnoma imzolashi ma’lum

O‘zbekiston terma jamoasi va “Roma” hujumchisi Eldor Shomurodov faoliyatini qaerda davom ettirishi ma’lum bo‘ldi.

Insayder Nikolo Skiraning xabar berishicha, futbolchi “Bolonya” bilan kelishuvga erishgan. Unga ko‘ra, forvard “qizil-ko‘klar” safiga sotib olish sharti bilan ijara asosida o‘tadi.

Shartnoma 1+4 ko‘rinishida imzolanadi. Ya’ni, futbolchi “Bolonya” tarkibida ma’lum miqdordagi gollarni kiritsa, bitim avtomatik tarzda yana 4 yilga uzaytiriladi.

Shartnoma summasi taxminan 9-10 million evro atrofida bo‘lishi kutilmoqda.

Ma’lumot o‘rnida, Eldor o‘tgan mavsum “Roma”ning A seriya doirasidagi 28 ta o‘yinda maydonga tushib, 3 ta gol va 4 ta golli uzatmani amalga oshirgan. Uning rimliklar bilan shartnomasi 2026 yilgacha amal qiladi.