Shomurodov bor va O‘zbekiston yangi chempionatda yuqori o‘rin uchun kurashadi!

Futbol olamida terma jamoalar ishtirokida yangi musobaqa tashkil etiladigan bo‘ldi. Markaziy Osiyo futbol assotsiatsiyasi (CAFA) birinchi chempionatida sakkizta terma jamoa o‘zaro kuch sinashishi ko‘zda tutilgan.

Hozircha, joriy yilning iyun oyida bo‘ladigan turnirda O‘zbekiston, Eron, Afg‘oniston, Turkmaniiston, Tojikiston va Qirg‘iziston terma jamoalari qatnashadi. Yana ikkita o‘rinni Rossiya va Tailand egallashi kutilmoqda.

Rossiya aslida boshqa qit’a vakili. FIFA va UEFA siyosiy motivlar tufayli Rossiya terma jamoalari va klublarini xalqaro musobaqalardan chetlatgan. Shuning uchun yangi turnirda rossiyaliklarning ishtirok etish ehtimoli katta.

O‘zbekiston milliy terma jamoasining sobiq futbolchisi Ilyos Zeytullaev rossiyalik jurnalistlarga Rossiya terma jamoasining Markaziy Osiyo futbol assotsiatsiyalari birinchi chempionatida qatnashishi bo‘yicha o‘z fikr-mulohazalarini bildirib o‘tdi.

- Albatta, Rossiya terma jamoasining borligi turnir saviyasini ko‘taradi. O‘zbekiston, Tojikiston, Turkmaniston kabi jamoalar futbolni rivojlantirish masalasida ancha narsa yutadi. Rossiya terma jamoasidan o‘rganish mumkin bo‘lgan jihatlar borligini bilamiz. Ularning saviyasi baland. Bizning terma jamoalar uchun turli yangi usullar va innovatsiyalarni almashish imkoniyati paydo bo‘ladi. Shaxsiy fikrim shunday, bu ajoyib ish bo‘ladi.

Rossiya turnir favoriti bo‘ladimi?

Shunday deb o‘ylayman. Eron ham bor. Bu jamoada doim iste’dodli o‘yinchilar ko‘p bo‘lgan. O‘zbekiston ham yuqori o‘rinlar uchun kurashadi. Chunki Eldor Shomurodov Italiyaga kelganidan keyin uning o‘rtidan ko‘p yoshlar futbolga mehr qo‘ydi.

Kuchli raqiblar sening ham saviyangni oshirishga xizmat qiladi. Futbolni rivojlantirish masalasida gapirsak, har doim ham o‘zingning darajangdagi yoki pastroq saviyaga ega jamoalar bilan o‘ynab bo‘lmaydi. Boshqasiga o‘sish mumkin emas. O‘ylashimcha, bo‘lajak turnir futbolchimiz uchun foydali bo‘ladi, - dedi Ilyos Zeytullaev “RB Sport” nashriga.

Ma’lumotlarga qaraganda, Markaziy Osiyo futbol assotsiatsiyalari (CAFA) birinchi chempionatining guruh bellashuvlari iyun oyida Toshkent va Bishkek shaharlarida o‘tkaziladi.

Musobaqa tashkilotchilari rejasiga ko‘ra, sakkizta terma jamoa har biri to‘rttadan ikkita guruhga bo‘linadi. Uchrashuvlar davra tizimida o‘tkaziladi.

Har ikki guruhda birinchi o‘rinni egallagan terma jamoalar finalda bosh sovrin uchun o‘zaro raqobatlashadi.  Guruhlardagi ikkinchi pog‘ona sohiblari uchinchi o‘rin uchun bahsda to‘qnash keladi.

Eslatib o‘tamiz, Ilyos Zeytullaev kuchli beshlik chempionatlarida to‘p tepgan ilk o‘zbekistonlik futbolchi hisoblanadi. Bu yarim himoyachi asr boshida “Yuventus”da o‘ynagan. Keyinchalik Italiyaning bir necha jamoalarida to‘p tepdi.

Ilyos Zeytullaev 2001-2007 yillar davomida O‘zbekiston milliy terma jamoasi safida o‘n marotaba maydonga tushib, raqiblar darvozasini ikki bor ishg‘ol qilgan.

Shomurodovga Dibala qachon joyini bo‘shatib beradi?

Abduxoliqov Premer-ligada ham porlay boshladi!

Shomurodov nega “Lill”, “Everton”, “Valyadolid” va “Bayer” taklifini qabul qilmadi?