Шомуродов жамоасини машҳур мураббий бошқаришга рози бўлди

А Серияда яна бир тур ўйинлари қолди. “Рома”ни юқор ўринга кўтарган ва Европа Чемпионлар лигаси йўлланмаси учун даъвогарга айлантирган Клаудио Раньери мавсум қандай якунланишидан қатъи назар мураббийлик фаолиятини расман якунлайди.

Аслида 73 ёшли мутахассис ўтган йили Элдор Шомуродов билан бирга “Кальяри”ни юқори дивизионда олиб қолганидан кейин бошқа мураббийлик қилмаслигини ва фақатгина қадрдон клуби “Рома”га ёрдам керак бўлиб қолса, ишига қайтишини айтганди.

Амалда шундай бўлиб чиқди. Мавсум бошида Даниэле де Росси ва Иван Юрич бошқарувидаги “Рома” инқирозга учради. Клуб раҳбарияти жамоани қутқаришни сўраб, Клаудио Раньерига мурожаат қилди.

Тажрибали мутахассис қисқа фурсатда нималарга қодирлигини кўрсатди. Янши ижрочиларсиз, катта трансферларсиз, таркибда бор ўйинчиларга таянган ҳолда натижа кўрсатиш мумкинлигини, гап жамоада эмас, мураббийлик маҳоратида эканини кўрсатиб қўйди.

Энди Раньери “Рома” клубига эгалик қилувчи Фридкинлар оиласига спорт йўланишида маслаҳатчи бўлади. Раньери анчадан бери ўз ўрнига янги бош мураббий топиш ишларида фаол иштирок этмоқда.

Нуфузли манбалардан бир нечтаси, хусусан, La Stampa нашри “Рома”нинг навбатдаги устози германиялик мутахассис Юрген Клопп бўлишини ёзди. Манбага кўра, Клопп римликларнинг таклифини 18 май куни қабул қилган.

Юрген Клопп жаҳон футболида “БоруссияДортмунд” ва айниқса, “Ливерпуль”ни бошқаргани орқали танилган. Немис мураббийи 2015-2024 йиллар давомида “қизиллар”га устозлик қилган. Унинг қўл остида ливерпулликлар Англия Премьер-лигаси, мамлакат кубоги ва Суперкубоги, Футбол лигаси кубоги, УЕФА Чемпионлар лигаси, УЕФА Суперкубоги, клублар ўртасидаги жаҳон чемпионатида зафар қучган.

Шунингдек, Юрген Клопп “Боруссия Дортмунд” жамоасида ҳам муваффақиятли ишлаб, бешта соврин соҳиби бўлди. Унинг бошқарувида дортмундликлар икки маротабадан Бундеслига ва мамлакат Суперкубогида ғолиб чиқди. Бир бор Германия кубоги соҳиби бўлди.

Мураббийликни 1988 йили бошлаган Юрген Клопп фаолиятининг дастлабки йилларида  “Айнтрахт”нинг ёшлар таркиби ва “Майнц”нинг асосий жамоасига ҳам устозлик қилган.

“Ливерпуль”даги тўққиз йиллик фаолиятидан кейин ўтган йили ёзда Юрген Клопп футболдан дам олиш ва янги ғоялар топиш мақсадида мураббийликдан танаффус олган эди. Бир муддат ҳордиқ чиқарган мутахассис 2025 йилнинг январидан бир неча спорт клубларга эгалик қилувчи Red Bull концернида глобал директор вазифасида ишлаб келаётган эди.

Агар Юрген Клоппнинг “Рома” бош мураббийлигини қабул қилгани расман тасдиқланса, Элдор Шомуродов жаҳон футболида ўз номига эга яна бир машҳур мураббийдан сабоқ олиш имконига эга бўлади. 29 ёшли легионеримиз Италиядаги фаолияти давомида бир неча устозлар билан ишлади. Улар орасида энг машҳурлари Жозе Моуриньо ва Клаудио Раньери ҳисобланади. Энди бу рўйхатга Юрген Клопп ҳам қўшилиши мумкин.

Элдор Шомуродов 2020 йилнинг октябридан бери А Серия ўйинчиси ҳисобланади. У Италиядаги фаолияти давомида “Женоа”, “Специя”, “Кальяри” ва “Рома”да ўйнаб келмоқда. Ҳамюртимизнинг Рим клуби билан шартномаси яна бир йилга узайтирилиб, Шомуродов 2027 йилнинг ёзигача пойтахт “бўрилари” сафида қолиши белгиланган.

Шомуродов жамоасини машҳур мураббий бошқаришга рози бўлди

Шомуродовга экспертлар неччи балл қўйди?