Shomurodov raqamini o‘zgartirdi!
Sports.uz portali e’tiboringizga “Jenoa” klubiga oid yangilik, xabar va ma’lumotlarni taqdim qilishni davom ettiradi.
Shomurodov yangi raqamda!
“Jenoa” yangi mavsumga tayyorgarlik doirasida birinchi sinov-nazorat uchrashuvini Avstriyaning “Shtubay” jamoasiga qarshi o‘tkazdi.
Uchrashuvda hisobni genuyaliklarning asosiy hujumchisiga aylanib borayotgan Eldor Shomurodov kiritgani haqida xabar bergan edik. 5:0 hisobida Davide Ballardini shogirdlari g‘alabasi bilan yakunlangan bahsda legionerimiz yarim soat o‘ynadi xolos.
Ushbu uchrashuvning video translyatsiyasi va fotolavhalarida e’tiborga molik vaziyat kuzatildi. Eldor Shomurodov shu kuni 11-raqamda to‘p surdi. Hamyurtimiz o‘tgan yili Italiya chempionatiga ko‘chib o‘tganida 61-raqamni tanlagan edi. O‘shanda Eldor Rostov viloyatining mintaqaviy raqamini rostovlik muxlislar hurmati uchun olganini aytgandi.
Hozircha, rasmiy qaydnomalarda Shomurodovning yangi raqam olgani haqida ma’lumot yo‘q. Bunisi mavsum rasman boshlanganida ma’lum bo‘ladi. “Jenoa” A Seriyadagi birinchi tur uchrashuvini Milan shahrida mamlakatning amaldagi chempioni “Inter”ga qarshi o‘tkazadi.
Ungacha, genuyaliklar “Insbruk”, PSJ va “Maynts-05” jamoalari bilan o‘rtoqlik uchrashuvlarida o‘z imkoniyatlarini sinoadan o‘tkazib oladi.
“Jenoa” darvozaboni ketdi!
Genuyaliklar Italiya terma jamoasi darvozaboni Salvatore Siriguni taklif etganidan keyin zaxira posboni Alberto Paleari klubdan ketishini aytgandi.
Genuya klubi rasmiy tarzda darvozabon bilan xayrlashganini e’lon qildi. Palearini “Benevento” keyinchalik sotib olish huquqi bilan ijaraga oldi.
Alberto Paleari “Jenoa”ga o‘tgan mavsumda qabul qilingan edi va A Seriya uchrashuvlarida uch marotaba maydonga tushgan. Endi iste’dodli darvozabon “Benevento” tarkibidan joy olish uchun kurashadi.
“Jenoa” porlagan futbolchi faoliyatini yakunladi
Shvetsiyalik himoyachi Andres Grankvist faoliyatini yakunlaganini e’lon qildi. “Xelsingborg” jamoasi tarbiyalanuvchisi bo‘lgan Grankvist faoliyati davomida Angliyaning “Uigan Atletik”, Niderlandiyaning “Groningen”, Italiyaning “Jenoa” va Rossiyaning “Krasnodar” jamoalari sharafini himoya qilgan.
Grankvist genuyaliklar safida 2011-2013 yillarda to‘p tepgan va jami 64 ta uchrashuvda maydonga tushib, raqiblar darvozasini ikki marotaba nishonga olishga ham erishgan. Shundan so‘ng, tajribali himoyachi “Krasnodar” jamoasi taklifini qabul qilib, 2018 yilgacha Rossiya premer-ligasida to‘p tepdi. Aytish joizki, 2014-2016 yillarda krasnodarliklar sharafini himoya qilgan Odil Ahmedov ham Grankvist bilan birga o‘ynagan.
Shved futbolchisi faoliyatining oxirgi bosqichini o‘zini tarbiyalagan “Xelsingborg”da o‘tkazdi. U Shvetsiya terma jamoasi safida 2006-2019 yillar davomida jami 88 ta bahsda maydonga tushib, himoyani mustahkamlash barobarida raqiblar darvozasini to‘qqiz marotaba ishg‘ol qilishga ham erishdi.
- Men uchun qiyin davr bo‘ldi. O‘z vijdonim va jamoadoshlarim oldida adolatli bo‘lish uchun qattiq kurashdim. Aqlim faoliyatimni davom ettirishimni istayapti, lekin tanam turli muammolarni yuzaga chiqara boshladi. Klubdagilar, oilam bilan maslahatlashib, butsalarimni mixga ilishga qaror qildim, - dedi Grankvist.
Fikrlar
Тугри еза оладиган журналистларни ишга олиш тавсия килинади