Shomurodov uchun A Seriyadagi 4-mavsum qanday o‘tdi?

Eldor Shomurodovni "Jenoa"dan 20 million evro evaziga xarid qilgan "Roma" uni o‘tgan yozda sota olmadi. Sababi, rimliklarga ular xohlayotgan summani hech kim berishni istamadi. Hujumchining ketma-ket ikki mavcumda ko‘p zaxirada qolib ketishi bunga asosiy sababdir. Terma jamoamiz sardorini "Kalyari" sotib olish bandi bilan bir mavsumga ijaraga olishga qaror qildi. 

Birinchi turda jamoa "Torino"ga qarshi o‘ynadi va Shomurodov zaxiradan maydonga tushib, debyutini amalga oshirdi. Nafaqat Eldor, balki sardiniyaliklar uchun ham mavsum yomon boshlandi. Raneri shogirdlari 10-turga kelib, birinchi g‘alabasini qo‘lga kiritdi. "Frozinone"ni taslim qilgan "Kalyari" turnir jadvalida 19-o‘ringa chiqib oldi. Shomurodov esa "Salernitana"ga qarshi bahsda yana asosiy tarkibga kira olmadi, lekin 84-daqiqada o‘yinga qo‘shilib, 4 daqiqadan so‘ng Violaning goliga assist amalga oshirdi. Ammo jamoa g‘alabani ushlab qola olmadi.

Afsuski keyingi turlarda yana uni murabbiy zaxirada qolidirishga qaror qildi. Faqatgina "Udineze" bilan bo‘lib o‘tgan bahsda boshlang‘ich tarkibdan joy oldi. 15-turda Sardiniya klubi "Sassuolo"ni o‘z maydonida qabul qiladi. Dastlab, gol o‘tkazib yuborgan mezbonlar ikkinchi taymga qo‘shib berilgan daqiqalarda imkoniyatlarni tenglashtirdi. Oradan ko‘p o‘tmay Shomurodov boshi bilan Pavolettiga pas berib, unga juda yaxshi imkoniyat yaratib beradi va hujumchi g‘alaba golini urishga muvaffaq bo‘ldi. 

Uch kundan keyin Shomurodovning mashg‘ulotlarda jiddiy jarohat olgani haqida xabarlar chiqdi. Shu bilan birga, uning Osiyo kubogini o‘tkazib yuborishi aniq bo‘ldi. Bu esa O‘zbekiston terma jamoasiga ham o‘z ta’sirini o‘tkazdi. 

Mavsumning dastlabki qismida hali ham gol ura olmagan Shomurodov qishki transferlar oynasida Sardiniyani tark etishga tayyor edi. Unga "Salernitana" jiddiy qiziqish bildirayotgandi. "Roma" ham bu transferga rozi bo‘ldi va uni ijaraga berishga qaror qildi. Ammo "Kalyari" taklifni rad qildi. Klub yangi hujumchi izlashni istamadi. Yakunda "Salernitana"  so‘nggi o‘rin bilan B Seriyaga yo‘l oldi. 

3 mart kuni maydonga qaytgan Eldor "Empoli"ga qarshi o‘yinda 3 daqiqa harakatlandi. Undan keyingi turda esa u o‘zining mavsumdagi eng yaxshi o‘yinini o‘tkazdi. "Salernitana" mehmoni bo‘lgan Raneri shogirdlari birinchi taymdan so‘ng Gaetano o‘rniga Shomurodovni tushirishga qaror qiladi va...

Oradan 6 daqiqa o‘tar-o‘tmas hujumchimiz Ochoa darvozasini ishg‘ol qildi. Bu uning "Kalyari" tarkibidagi debyut goli edi. Ikkinchi gol ham ko‘p kuttirmadi. 76-daqiqada u yana bir marotaba meksikalik posbonni lol qoldirdi. Bu o‘yin orqali Eldor asosiy tarkib uchun kurashga qaytdi. Keyingi uchrashuvlarda Raneri futbolchimizga ko‘proq imkoniyat berdi. 

Jarohatdan kapitanimiz kuchliroq bo‘lib qaytdi. U barcha chempionatlarda 8 ta o‘yinda maydonga tushib, 5 ta gol urdi va 1 ta assistni o‘z nomiga yozdirib qo‘ydi. 

"Atalanta"ga qarshi bahsda yana bir assist amalga oshirgan Shomurodov "Inter" bilan bo‘lib o‘tadigan uchrashuv uchun boshlang‘ich tarkibdan joy oldi. Hisobda oldinda borayotgan mezbonlar xotirjamlik bilan g‘alabani qo‘lga kiritishiga ishonib turgan bir paytda Eldor Zommer qo‘riqlayotgan darvozaga to‘pni joylab qo‘ydi va jamoasini uyg‘ota oldi.

Shomurodov ushbu mavsum "Kalyari" tarkibida 6 ta golda ishtirok etdi. (3 ta gol, 3 ta assist). Jamoa esa A Seriyada qolishni epladi. Eldor uchun bunisi so‘nggi 3 mavsumdagi eng yaxshisi bo‘ldi. Oxirgi marta u 2021/22 mavsumda 3 tadan ko‘p gol urgandi. Endi futbolchining kelajagi ham barcha uchun qiziq bo‘ladi. Sababi, Rim klubida rahbariyat va bosh murabbiy o‘zgardi va manbalar Shomurodovni jamoa bu yozda ijaraga berishga emas, balki sotishga harakat qilishi haqida xabarlar bermoqda. Shu bilan birga, sardiniyaliklar ham shartnomadagi hujumchini 9 million evroga sotib olish bandini faollashtirishi qiyin masala.

Suhrob Xolbekov yozdi