Shomurodovga kutilmagan yangi xaridor chiqdi, lekin...

Evropada qishki transferlar oynasi yopilganiga qaramay, Eldor Shomurodov atrofidagi vaziyat tinchigani yo‘q.

Ma’lumki, yanvar oyida 29 yoshli legionerni olish uchun A Seriyada jon saqlab qolish uchun kurashayotgan “Venetsiya”, “Kalyari” hamda “Empoli” harakat qilib ko‘rdi. Bu jamoalarning barchasi “Roma” bilan o‘zbek hujumchisi bo‘yicha muzokara olib bordi.

Eldor Shomurodov “Venetsiya”ga ko‘chib o‘tishiga juda yaqin qolgandi. “Venetsiya” rahbariyati o‘zbek hujumchisi bo‘yicha rimliklar qo‘ygan barcha talabni qabul qildi. Bu klub legionerimizni mavsum oxirigacha ijaraga olib, keyin 3,5 million evro evaziga to‘liq transfer qilishga ko‘ngandi.

Lekin bosh murabbiy Klaudio Raneri klub rahbariyatidan Evropa ligasi umumiy bosqichining so‘nggi uchrashuvi – “Ayntraxt”ga qarshi o‘yingacha Eldorni bezovta qilmaslikni so‘radi. O‘sha bahsda hamyurtimiz gol urib, jamoasini pley-offga olib chiqqan edi.

Bu voqeadan keyin Klaudio Raneri Shomurodovdan voz kechmasligini ta’kidladi.

Shunga qaramay, Eldor Shomurodovga MLS chempionati vakili “Toronto”dan jiddiy qiziqish bo‘lmoqda.

Bir necha manbaning ta’kidlashicha, torontoliklar o‘zbek futbolchisini to‘liq transfer qilishga tayyor va bu borada rimliklar bilan muzokaralarni davom ettirmoqda.

“Toronto” keyingi ikki mavsumdagi beqarorlikdan keyin tarkibini kuchaytirib, yuqori maqsadlar sari kurashishni maqsad qilgan. Ana shu maqsadda, darvozani qo‘riqlash uchun yoshlar iste’dodli golkiper Adisu De Rosario bilan shartnoma imzolab, asosiy tarkibga o‘tkazdi.

20 yoshli bu darvozabon MLSning afsonaviy darvozaboni Dueyn De Rosarioning o‘g‘li. Adisu “Toronto”ning ikkinchi jamoasida 25 ta uchrashuvda 55 ta seyvni amalga oshirganidan keyin muxlisu mutaxassislar nazariga tushdi.

“Ummonorti” klubi hujumni kuchaytirish uchun Eldor Shomurodovni tanladi. Bu bejiz emas, albatta.

“Toronto” Italiya futboli vakillariga hurmat bilan munosabat qilishi an’anaga aylandi. Hozir bu jamoa safida A Seriya yulduzlaridan Federiko Bernardeski va Lorentso Insine to‘p tepmoqda.

Federiko Bernardeski o‘z davrida “Fiorentina” va “Yuventus”da hujum chizig‘i etakchisi bo‘lgan va 2022 yildan beri “Toronto” sharafini himoya qilib kelmoqda.

Italiya terma jamoasining mashhur hujumchisi Lorentso Insine esa, “Napoli”dagi o‘n yillik faoliyatidan keyin mana uch yildan beri “Toronto”da o‘ynayapti. Mana shu ikki yulduz torontoliklarning asosiy o‘yinchilariga aylanib ulgurdi.

Manbalarning ta’kidlashicha, “Toronto”ga Eldorni olish oson bo‘lmaydi. Chunki Klaudio Raneri xorij klubining o‘z shogirdiga bo‘lgan qiziqishidan xabardor. Biroq 71 yoshli mutaxassis Eldor Shomurodovning jamoadan ketishiga ruxsat bermayapti.

Ta’kidlash joizki, MLS chempionatida qatnashib kelayotgan AQSh va Kanada jamoalari uchun qishki transferlar oynasi 23 aprelga qadar ochiq bo‘ladi.   

Angliya, Husanovni yaxshilab tanib ol! Abduqodirning uchta “laqabi”ni aytishdi...

Husanov armon bo‘lib qolgan ekan...

Sensatsiya: Husanovning ustozi “Real”ning eng zo‘r o‘yinchisini oladigan bo‘ldi

Jahon chempioni Husanovga qanday baho berdi?

Legionerimiz jamoasini Evrokuboklarga olib chiqmoqchi!