Шомуродовни беринглар! Элдорга жиддий харидор чиқди...
“Рома” Жозе Моуриньо қўл остида А Серияда юқори ўринлар учун курашмоқда. Бироқ, “бўрилар”нинг Европа лигасидаги иштироки мухлисларни хушнуд этаётгани йўқ. Мураббийлар штабини етакчи ўйинчиларнинг кўп жароҳат олаётгани безовта қиляпти.
Жозе Моуриньо таркибни ротация қилишни хуш кўрмайди ва шу боис, катта оғирлик асосий таркибга мунтазам жалб қилинаётган ўйинчиларга тушмайди.
Бизни қизиқтираётган масала эса, Моуриньо Элдорга имконият бермаётгани билан боғлиқ. “Рома”нинг Генуяда “Сампдория”га қарши ўтказилган баҳсида ҳам Шомуродов захирада қолдирилди. Қизиғи, ўтган йили Элдор айнан “Сампдория”га қарши баҳсда захирадан ўйинга қўшилиб, жамоасига дуранг натижа келтирганди.
Жорий мавсумда ҳамюртимиз А Серияда уч бор кўриниш берди ва жами 37 дақиқа ўйнади. Бу вақтни ўйинчига ўзини кўрсатиш учун берилган имконият, деб бўлмайди.
Шомуродовнинг захирада қолиб кетаётгани унга харидорларнинг эътиборини қаратмоқда. Ёзда асосий тўпурари Андреа Белоттидан айрилган “Торино” янги мавсумда ҳужумчи масаласида муаммога дуч келди. Ҳозир Турин клубида уч ҳимоячи бор. Улардан парагвайлик Антонио Сарабия тўққизта ўйинда атиги иккита гол урди. Италиялик Пьетро Пеллегри мунтазам ўйнаётган бўлса-да, ҳали голлари ҳисобини очгани йўқ. Франциялик Янн Камаро учта баҳсда майдонни қуруқ тарк этди.
“Торино” бош мураббийи Иван Юрич клуб директори Давиде Вагнатидан “Рома” фойдаланмаётган Элдор Шомуродовни олиб келишни талаб қилмоқда.
Италия футболини ёритишга ихтисослашган https://footballnews24.it сайти эксперти Федели Контининг маълум қилишича, айни пайтда Давиде Вагнати пойтахтлик “бўрилар”дан ўзбек ҳужумчисини олиш йўлларини қидирмоқда.
Таъкидлаш жоизки, “Торино” ёзда ҳам Шомуродовни олишни бир неча бор уриниб кўрганди. Лекин бу трансфер амалга ошмай қолди.
Умуман олганда, ёзги трансферлар ойнаси даврида легионеримизга харидор етарлича чиқди. Хусусан, Италиядан “Монца”, “Сассуоло”, “Торино”, “Салернитана”, “Болонья”, Германиядан “Штуттгарт”, Франциядан “Ницца”, Туркиядан “Трабзонспор”, “Бешиктош”, “Галатасарой”, Россиядан ЦСКА ва Саудия Арабистониданидан “Ал-Ҳилол” қизиқиш билдиргани ҳақида маълумотлар тарқатилганди. Улардан бир нечтаси Рим клубига аниқ таклиф билан чиқди.
Яқинда “Болонья” раҳбарияти ҳам Шомуродовни ўз сафига қўшиб олиш ниятидан қайтмагани маълум бўлганди. Жамоани қабул қилиб олган собиқ машҳур футболчи Тьяго Мотта асосий ҳужумчи сифатида ўзбек форвардини кўраётганини таъкидлаб, клуб мутасаддилари олдига қишки трансферлар мавсумида асосий нишон сифатида ўзбек ҳужумчисини олиб келишни вазифа қилиб қўйди.
Элдор Шомуродовнинг легионерга айланишида, Италия чемпионатига кўчиб ўтишида унга ёрдам берган ва манфаатларини ҳимоя қилиб келаётган ProSports Management компаниясининг Осиёдаги лойиҳаларига раҳбарлик қилувчи Қаҳҳор Мўминов агар Шомуродов фаолиятида ижобий томонга ўзгариш бўлмаса, қишда “Рома” раҳбарияти билан учрашув бўлишини таъкидлаган.
.jpg?1666058975898)
Шунингдек, бу мутахассис ёзда Жозе Моуриньо Элдорни бошқа жамоаларга қўйиб юбормай, албатта, ўзини кўрсатиши учун имкон берилишини айтганди.
Comments