Шомуродовни қўллаб-қувватлашмади!

Ўзбекистон миллий терма жамоаси сардори Элдор Шомуродов  янги мавсумни “Кальяри”да бошлаши ҳақида маълумотлар тарқатилган эди.

Хусусан, “Кальяри” мутасаддилари “Рома” раҳбариятини ўзбек футболчисини кейинчалик 9 миллион еврога сотиб олиш ҳуқуқи билан, бир миллион евро эвазига келаси мавсум учун ижарага беришга кўндирди.

“Кальяри”ни бошқараётган машҳур мураббий Клаудио Раньери Элдор Шомуродовни асосий таркибда ўйнатишни режалаштирмоқда. Италиялик мутахассис Борха Майораль ва Анастасиос Доувикас вариантларини четга суриб, Элдор Шомуродовни танлагани ҳамюртимизга янги жамоага йўл очди.

Россиянинг “Матч ТВ” сайти Элдор Шомуродов трансферига “Рубин” марказий ҳимоячиси Рустам Ашурматовдан муносабат сўради.

- Сиз илгари Россия Премьер-лигасида ўйнамагансиз. Россия чемпионатини қандай баҳолайсиз?

- Бу яхши мусобақа, унда ўйнаш қизиқарли. Менга Россия чемпионати жуда ёқади. Мен аввал ҳам Россия Премьер-лигасини кузатиб борганман. Бу ерда менинг дўстларим тўп тепган.

- Айнан ким?

-  Элдор Шомуродов. У ҳозир “Кальяри” жамоасига кўчиб ўтди. Ҳали Элдорга қўнғироқ қилиб гаплашганим йўқ. Лекин янги жамоасидаги ишлари “Рома”дагидан муваффақиятли бўлишига умид қиламан.

- Шомуродов Италиядаги фаолиятини зўр бошлади. Кейин ҳаммаси аста-секин ортга кета бошлади. Жозе Моуриньо билан характери тўғри келмадими?

- Футболда баъзан сенга дўстларинг, жамоа ва мураббий ёрдами жуда керак бўлади. “Рома”да бундан бўлмади, “Женоа”да эса, бу ҳолатни бор эди. Умид қиламанки, “Кальяри”да бундан яхши бўлади.

Дарҳақиқат, Ўзбекистон миллий терма жамоаси етакчиларидан – Элдор Шомуродов ва Рустам Ашурматовнинг йўллари клублар миқёсида “Бунёдкор”да кесишган.

Элдор 2015 йилнинг бошида “Машъал” жамоасидан “қалдирғочлар” сафига қўшилган. Моҳир ҳужумчи пойтахт жамоасида 2017 йилнинг ёзигача – Россия Премьер-лигаси вакили – “Ростов”га кўчиб ўтгунча тўп тепган.

Рустам Ашурматов ҳам, ўзини тарбиялаган “Қўқон-1912” жамоасидан “Бунёдкор”га Шомуродов билан бир пайтда олиб келинган эди.

2019 йилнинг февралигача Тошкент шаҳри жамоаси шарафини ҳимоя қилган маҳоратли ҳимоячи, Жанубий Кореяга йўл олиб, бир неча мавсум давомида “Кванджу” ва “Канвон” жамоалари шарафини ҳимоя қилди.

Орада бир йил юртимизга қайтиб, “Навбаҳор”да ўйнаган Рустам Ашурматов 2023 йилнинг январида “Рубин”га кўчиб ўтди ва қозонликларнинг биринчи лига ғолибига айланиб, юқори дивизионга чиқишига кўмаклашди.

Таъкидлаш жоизки, Элдор Шомуродов Ўзбекистон миллий терма жамоасидаги фаолиятини Рустам Ашурматовдан икки йил олдин – 2015 йили бошлаб, ҳозиргача 65 та учрашувда 37 та тўп киритди.

Ашурматов эса, 2017 йилдан бери халқаро майдонда 23 маротаба майдонга тушган ва бугунги кунда терма жамоамизнинг асосий ҳимоячиларидан ҳисобланади.