Шомуродовнинг устози қайси жамоа чемпион бўлишини айтди

Таниқли италиялик мураббий Клаудио Раньери янги мавсумда А Серияда чемпионлик учун қайси жамоаларнинг имконияти юқори эканини таҳлил қилиб берди.

Маълумки, Италия чемпионатида ўтган йили “Наполи” чемпионликка сазовор бўлиб, Милан шаҳри вакиллари – “Милан” ва”Интер”дан чемпионлик унвонини тортиб олди.

Бу мавсум ҳам одатдаги даъвогарлар Скудетто учун курашади. Ҳозир ҳамма тенглашишни истаётган жамоа “Наполи”дир. Менимча, янги мавсумда ҳам шундай бўлиб қолади.

“Милан” ва “Интер” ҳам чемпионлик учун ҳаракат қилаётган жамоалар орасида бўлади. “Рома” Европа Чемпионлар лигасига қайтишни ўз олдига мақсад қилиб қўйган.

Еврокубоклардан қуруқ қолаётган “Ювентус” нима қилиб бўлса ҳам, Италия чемпионлигини қўлга киритишга уринади.

Номзодлар гуруҳига “Лацио”ни қўшиш мумкин. Энг катта сюрпризларни “Аталанта”дан кутиш керак, - деди “Кальяри”ни мавсумга тайёрлаётган Клаудио Раньери.

Тажрибали мутахассис Сардиния клубини 2023 йилнинг бошида қабул қилиб олганди. Раньери “Кальяри”ни ярим мавсум ичида А Серияга олиб чиқишни уддалади.

Клуб раҳбарияти мураббийлар штаби ва жамоа олдига юқори дивизионда қолиш вазифасини юклаган. Бунга эришиш учун Раньери таркибни кучайтиришга қарор қилди.

Ана шу мақсадда ёзги трансферлар вақтида сардинияликлар “Рома”дан Элдор Шомуродовни трансфер қилди. Раньери қарорига кўра, ўзбек легионери мураббийлар штаби қўллайдиган 4-4-2 схемасида икки ҳужумчидан бири сифатида ўйнаши керак бўлади.

“Кальяри” ҳамюртимизни кейинчалик тўлиқ трансфер қилиш ҳуқуқи билан бир мавсумга ижарага олди. Бу муддат учун сардинияликлар римликларга бир миллион евро тўлайди. Агар Шомуродов мавсум давомида ўзини кўрсата олса, “Кальяри” келаси ёз ўзбек форвардининг трансферини 9 миллион еврога тўлиқ харид қилиши мумкин.

Шу боис, “Кальяри” раҳбарияти Элдор Шомуродов билан шахсий шартномани  1+3 кўринишида  имзолаган.  

Клаудио Раньери Элдор Шомуродовдан ташқари яна бир неча маҳоратли ўйинчиларни ўз жамоасига қабул қилиб олди. СПАЛдан Маттео Прати, “Верона”дан Иброҳим Сулемана, “Сампдория”дан Томассо Аугелло, “Ювентус” ёшлар жамоасидан Алессандро Ди Пардо, “Ольбия”дан Кристиан Траваглини, “Интер”дан Гаэтано Ористанио, Испаниянинг “Хетафе”сидан Якуб Янкто ҳамда Руминиянинг ЧФР клубидан дарвозабон Симоне Скуффет фаолиятини “Кальяри” жамоасида давом эттирадиган бўлди.

Янги мавсум Клаудио Раньери шогирдлари учун муваффақиятли бошланганини таъкидлаш лозим. Сардинияликлар мавсумнинг биринчи расмий учрашуви – Италия кубоги доирасида кучли рақиб – “Палермо” жамоасини 2:1 ҳисобида мағлубиятга учратиб, кейинги босқичга йўлланма олди.

Айни пайтда жамоа А Сериянинг биринчи тур ўйинига тайёргарлик кўрмоқда. “Кальяри” футболчилари 21 август куни Турин шаҳрида “Торино” жамоаси меҳмони бўлади. Беллашув Тошкент вақти билан соат 21:30 да бошланади.

Шомуродов бу “юк”ни кўтара олмайдими?

Ҳусанов жамоаси Чемпионлар лигаси учун кўп гол урадиган ҳужумчини оляпти

Шомуродов: Мессига ҳеч қандай алоқам йўқ! (фото)

Премьер-лига клуби тез орада ўзбек футболчиси трансферини эълон қилади