Шота Арвеладзе: ЖЧ бизга кўп нарсаларни кўрсатиб берди, ҳаммасини бошидан бошлаймиз

"Пахтакор" бош мураббийи "Бухоро"га қарши учрашув арафасида бўлажак ўйин ҳақида фикрларини билдириб ўтди.

- Деярли яна барчаси бошидан бошланади. Ҳамма қайтадан эътиборини қаратиши керак. Клуб, раҳбарият, ўйинчилар ва албатта, ишқибозлар ҳам. Олдимизда келажакка жиддий режалар турибди. "Пахтакор"дан кўп ва кўп янгиликлар кутишади. Ўзбек футболи учун ҳам янги ҳодисалар зарур.

Жаҳон чемпионати бизга кўп нарсаларни кўрсатиб берди. "Пахтакор"нинг тўғри йўлда эканига ишонч ҳосил қилдик. Чемпионатда бизнинг ўйинларимиз сценарийсига ўхшаган учрашувларни кузатдик. Олдимизга белгилаб олган йўлдан юришда давом этамиз.

Клуб ва жамоа мухлислардан кўпроқ қўллаб-қувватлашни сўрайди. Биздан ғалаба кутишларини яхши биламиз. Биз эса клуб раҳбарияти ва мураббийлар штаби номидан ўзбек футболи мухлисларига олға қадам босишдан тўхтамасликка ваъда берамиз.