Шуҳрат Мақсудов ўйин пайтида ким билан телефонда гаплашганди? Пенальти талашиб қолган ўйинчиларга қандай чора кўради? Бош мураббий суҳбатда нималар деди?

Суперлиганинг 4-турида “Бунёдкор” клуби ўз майдонида Самарқанднинг “Динамо”сини қабул қилди. Жуда қийин кечган беллашувда мезбонлар 2:1 ҳисобида ғалаба қозонди.

Аввалига меҳмонлар ҳисобни очганди. Аммо иккинчи бўлимда воқеалар ривожи ўзгарди. “Динамо”дан бир футболчи четлатилди. Мезбонлар ғалаба учун охиригача курашди ва бунинг натижасида мақсадига эришган ҳолда ғалабани рақибдан тортиб олди.

“Бунёдкор” бош мураббийи Шуҳрат Мақсудов иккита ўйинга дисквалификация қилингани учун ўйинни трибунадан кузатишга мажбур бўлди. Шу боис, матбуот анжуманида унинг ёрдамчиси Виктор Карпенко қатнашди. Ўйиндан кейин Sports.uz мухбири Мақсудов билан суҳбатлашди.

- Ғалаба билан табриклайман. Ўйинни четдан кузатиб бордингиз. Бундай пайтда бошқача ҳаяжон бўлса керак-а?

- Табрик учун катта раҳмат. Кўпчилик ғалабамизга ишонмаганди. Айниқса, 0:1 ҳисобида ютқазиб турганимиздан кейин ютолмайди, деганлар кўп бўлди. Футболчиларимга охиригача курашгани учун катта раҳмат. Танаффус чоғида йигитлар билан шу ҳақда яхшилаб гаплашиб олгандик. Учрашувгача ҳам футболчиларимизга “Динамо” про лигадан чиққан, деб бўшашманглар, дея роса тайинлаб келгандик. Лекин бу руҳият билан боғлиқ. Хоҳлаймизми-йўқми, фикримча, барибир йигитлар бироз бўшашган. Биринчи таймда ўйинимиз умуман ўхшамади, ўзимиз кутгандек ҳаракат қила олмадик. Аксига олиб пенальтидан ҳам гол ура олмадик. Иккинчи бўлимда жамоамиз маҳоратини кўрсатди. Айниқса, ғалабага бўлган иштиёқ ва хоҳиш катта бўлди. Ғалабамизга охиригача ишонган мухлисларимиз учун ўйнаб, уч очкони қўлга киритганимиз боис ўйинчиларимизга раҳмат.

- Сиз учун ўйинни қаердан кузатиш қийин: захира ўриндиғиданми ёки трибунаданми?

- Албатта, четдан кузатиш жуда ҳам қийин. Барибир вужудим билан майдонда, футболчиларим билан бирга эдим. Ёрдамчим орқали суҳбатлашиб турдик. Айниқса, рақиб бир киши кам бўлиб қолганидан кейин ҳужумни янада кучайтириш мақсадида ҳимоячи ўрнига ҳужумчи ва ҳужумкор ярим ҳимоячини майдонга туширдик. Ўйлайманки, ушбу қилган қароримиз ҳам ўзини оқлади. Ҳакамлар яна бир голимизни ҳисобга олишмади. Менимча, тоза гол ургандик. Майли, буни муҳокама қилгим келмаяпти. Энг муҳими, уч очкони қўлга киритдик. Яна бир бор футболчиларимга ва бизни охиригача қўллаб-қувватлаб турган ишқибозларимизга катта раҳмат.

- Биринчи бўлимда Томива пенальтидан гол ура олмади. Аммо 11 метрли жарима зарбаси тепилишидан аввал, у Дилшод Жўраев билан талашиб қолди. Аслида пенальти тепишни кимга буюргандингиз?

- Биз бу масалада буюрмагандик. Машғулотларда бунинг устида ишлаяпмиз. Аммо ўзимиз кўзлаган ўйинчи машғулотда уролмаяпти, ўйинда эса аксинча. Олдинги учрашувда пенальтидан гол урганди, бугун эса уролмади. Бу – футбол. Йиқилишингни билсанг, кўрпача солиб қўясан, деган мақол бор. Ўша вазиятда журналистларга ҳам, мухлисларга ҳам нотўғри талқин қилмасликларини сўраб қолган бўлардим. Беайб Парвардигор! Четдан туриб гапириш энг осон йўл. Бироқ бу билан футболчиларимизнинг қилган ишини оқламоқчи эмасман. Танаффус пайтида биринчи қилган ишим ўша иккала ўйинчини захирага олдим. Барибир, биринчи навбатда, интизомни биринчи ўринга қўяман. Футбол мухлислар учун, буни унутмаслигимиз керак. Ўйинчиларимиз қизишиб кетганлигини инобатга олиш керак. Барибир майдонда бундай қилиш ярашмайди. Ҳозир иссиқ ҳиссиётлар пайтида бир нима дея олмайман, бир-икки кундан кейин албатта муҳокама қиламиз. Шундай қолиб кетмайди, албатта жаримага тортамиз ва қаттиқ назоратга оламиз.

- Сир бўлмаса, қанча миқдорда жаримага солинади?

- Бу фақат бизнинг ички сиримиз. Ташқарига олиб чиққим келмаяпти.

- Ўйиндан аввал тартиб-интизом қўмитаси қарорига кўра, сиз иккита учрашувга дисквалификация қилиндингиз. Учрашувга тайёргарлик чоғида бу сизга қанчалик таъсир қилди?

- Албатта, ноқулай бўлди. Майдон четида футболчиларга тезкорлик билан кўрсатма бериш мумкин. Трибунадан эса то ёрдамчини чақириб айтгунча вақт кетади. Пешонамизда шу ҳам бор экан, майли, зарари йўқ. Барибир Аллоҳ бизга мададкор бўлди.

- Дисквалификацияга сабаб сифатида сизни ўйин чоғида мобил телефондан фойдаланганингиз кўрсатилган. Қизиқ, ўша пайтда ким билан гаплашдингиз?

- Ҳеч қандай сири йўқ. Ўша пайтда раҳбарият томонидан телефон бўлиб қолгани учун жойимда ўтириб гаплашмадим, ичкарига кириб қўнғироққа жавоб бердим.