“Siti” markaziy himoyachisiga narx belgiladi

“Manchester Siti”ning yetakchi markaziy himoyachilaridan biri hisoblangan Yoshko Gvardiol faoliyatini Ispaniya chempionatida davom ettirishi mumkin.

The Independent nashri ma'lumotiga koʻra, xorvatiyalik futbolchiga “Barselona”dan tashqari “Real Madrid” ham ogʻiz sola boshladi. Madriddliklar futbolchi uchun kurashda boshqa top-klublarni ortda qoldira olishiga ishonmoqda.

“Manchester Siti” rahbariyati Xosep Gvardiola ketganidan keyin jiddiy oʻzgarishlarga tayyorgarlik koʻrmoqda va ayrim futbolchilarning ketishiga yoʻl qoʻyib beradi. Xususan, “shaharliklar” Yoshko Gvardiol boʻyicha 70–75 million yevro atrofida narx belgilagan va takliflarni koʻrib chiqadi.

Yoshko Gvardiol 2023 yili “RB Leyptsig” klubidan “Manchester Siti”ga 90 million yevro evaziga oʻtgan edi. Uning shartnomasi 2028 yilning 30 iyunigacha amal qiladi.

2025-2026 yildagi mavsumda himoyachi “shaharliklar” safida barcha turnirlarda 25 ta oʻyin oʻtkazib, 2 ta gol urdi va 5 ta golli uzatmani amalga oshirdi. Transfermarkt portali Yoshko Gvardiolning qiymatini 70 million yevro deb baholamoqda.