“Сити” ўйинчиси талаш бўляпти

“Манчестер Сити” асосий таркибига кира олмаётган Натан Аке 2026 йилги жаҳон чемпионатида қатнашиш учун муқим ўйин амалиётига эга бўлиши талаб этилади. Шу боис, 30 ёшли марказий ҳимоячи январда жамоасини ўзгартирмоқчи.

Ҳозиргача, нидерландиялик футболчи учун “Барселона” асосий даъвогар бўлиб турганди. Каталонияликлар Акени оғир жароҳат олган марказий ҳимоячи Андреас Кристенсен ўрнига олиб келмоқчи эди.

Caught Offside нашрининг хабар беришича, Англия Премьер-лигасининг ўзида бу ҳимоячига талабгорлар кўпайиб кетди. Хусусан, “Борнмут”, “Кристал Пэлас”, “Фулхэм” ва “Вест Хэм” Акени Каталонияга кетишига тўсқинлик қилиши мумкин.

Бу клублар каталонияликлардан фарқли равишда Натан Акени тўлиқ трансфер қилиш вариантини ўртага ташлаяпти.

“Шаҳарликлар” 30 ёшли ҳимоячини 30–35 миллион евро атрофидаги маблағ эвазига қўйиб юборишга тайёр. Қайд этилишича, молиявий чекловлар мавжудлиги сабабли “Барселона” Акени тўлиқ трансфер қилиши қийин бўлади.

Аке 2020 йил ёзидан буён “шаҳарликлар” сафида тўп суради. Жорий мавсумда у барча мусобақаларда 13 та ўйинда иштирок этди, аммо натижали ҳаракатлар билан ажралиб турмади.

Футболчининг клуб билан меҳнат шартномаси 2027 йил ёзигача амал қилади. Transfermarkt портали маълумотларига кўра, футболчининг бозор қиймати 18 миллион еврони ташкил қиляпти.