“Сити”дан кетган юлдузни чемпион жамоа чақиряпти

Англиянинг амалдаги чемпиони – Лондоннинг “Арсенал” клуби Вильям Салибанинг жиддий жароҳатидан сўнг марказий ҳимоя чизиғини кучайтириш вариантларини ўрганмоқда.

Франциялик ҳимоячи белидаги жароҳат туфайли келаси мавсумнинг биринчи ярмини тўлиқ ўтказиб юбориши мумкин.

The Sun Football нашрининг хабар беришича, “тўпчилар” эркин агент мақомини олган англиялик марказий ҳимоячи Жон Стоунзга қизиқиш билдирмоқда. “Манчестер Сити” билан амалдаги шартномаси тугаган 32 ёшли Стоунз энди чемпион жамоада Салибанинг ўрнини босиши мумкин.

Стоунз ўн йил давомида “шаҳарликлар” сафида тўп суриб, шу вақт ичида олти марта Англия Премьер-лигаси чемпиони бўлган. Англиялик ҳимоячининг шартномаси июль ойи бошида якунланган.

Тажрибали марказий ҳимоячига Италиянинг “Интер” ва “Ювентус” клублари ҳам қизиқиш билдирмоқда.