“Сити”дан ўйнаган футболчи Мбаппенинг жамоасига мураббий бўлди

“Манчестер Сити” ва Франция миллий терма жамоасининг собиқ футболчиси Гаэль Клиши ўз юртида “Кан” жамоасига бош мураббийлик қиладиган бўлди. Бу ҳақда клубнинг расмий сайти хабар берди.

- “Кан” футбол клуби Гаэль Клиши профессионал жамоа бош мураббийи этиб тайинланганини эълон қилади. Франция терма жамоасининг собиқ ўйинчиси клубга энг юқори даражадаги тажриба, замонавий футболни чуқур билиш ва юксак стандартларни олиб келади.

“Арсенал” ва “Манчестер Сити”да футболчи сифатида тўп сурганидан сўнг, Гаэль ўртада “Истанбул Башакшеҳир” ва Женевадаги “Серветт” клубларида ўйновчи-мураббий сифатида фаолият юритди.

Кейинчалик у Тьерри Анри билан бирга Франциянинг 21 ёшгача бўлган футболчилардан таркиб топган терма жамоасида мураббий сифатида ишлади. Бу тажриба 2024 йил Париж Олимпиадаси ўйинларида иккинчи ўрин билан якунланди.

Унинг ишида Марвин Эсор ҳамроҳ бўлади, у ҳозирги мураббийлар штабига қўшилади, штаб таркиби эса ўзгаришсиз қолади.

“Кан” футбол клуби янги мураббийни қутлаб, мавсумнинг иккинчи ярмидаги вазифаларни ҳал этишда унга тўлиқ қўллаб-қувватлашини билдиради, - дейилади “Кан” клубининг расмий сайтидаги хабарда.

Эътиборли жиҳати шундаки, Клиши фаолиятининг илк босқичида айнан шу жамоа сафида тўп сурган. Клубнинг асосий акциядори “Реал” ҳужумчиси Килиан Мбаппе ҳисобланади. Айни пайтда “Кан” Франциянинг учинчи дивизионида иштирок этмоқда.