Слот Алиссоннинг "Ювентус"га ўтиши ҳақидаги миш-мишларга муносабат билдирди

"Ливерпуль" бош мураббийи Арне Слот дарвозабон Алиссон Бекернинг "Ювентус"га эҳтимолий трансфери ҳақида тарқалган хабарларга изоҳ берди.

Италия матбуоти ва бир қатор инсайдерлар сўнгги кунларда бразилиялик посбоннинг туринликлар билан музокара олиб бораётгани ҳақида ёзмоқда. Бироқ Слот бу гапларга жиддий эътибор қаратмаётганини таъкидлади.

"Мен фақат яқин истиқболга — уни тезроқ дарвозага қайтаришга эътибор қаратганман. У ҳақида, мен ҳақимда ва бошқалар ҳақидаги бундай гап-сўзларни муҳокама қилмаймиз. Фақат зарурат бўлганда фактларга мурожаат қиламиз, ҳозир эса бундай ҳолат эмас", — деди Слот.

Алиссоннинг "Ливерпуль" билан амалдаги шартномаси 2027 йил ёзига қадар мўлжалланган. 33 ёшли дарвозабон жорий мавсумда 34 та ўйинда қатнашиб, 13 бор ўз дарвозаси дахлсизлигини сақлаб қолди ва 36 та гол ўтказиб юборди.