Сўнгги учрашув! Португалия терма жамоаси раҳбарияти Роналду билан музокара бошлайди

Португалия Футбол федерацияси миллий жамоа таркибидаги фаолиятига якун ясаш арафасида турган беш карра "Олтин тўп" соҳиби Криштиану Роналду учун махсус хайрлашув ўйини ўтказиш масаласини муҳокама қилмоқда. 

Бу ҳақда Notcias ao Minuto портали француз нашри L`Equipe маълумотига таяниб хабар берди.

Аввалроқ ТАСС хабарига кўра, Роналду Миллатлар лигаси гуруҳ босқичи учинчи турида Данияга қарши баҳс (4:2) олдидан Португалия терма жамоаси қароргоҳини тарк этган эди. Ҳужумчи бу қарор сабабларини келажакда очиқлашини айтган. У шунингдек, иккинчи турда Норвегияга қарши ўйинда (2:1) ҳам майдонга тушмаган. Португалия Футбол федерацияси вакиллари келаси ҳафта Роналду билан учрашиб, уни миллий жамоа бош мураббийи Жорже Жезуш билан яқинлаштиришга уриниши кутилмоқда.

Роналду 41 ёшда. У беш марта Чемпионлар лигаси ғолиби бўлган, Европа чемпиони унвонини қўлга киритган, икки бор Миллатлар лигасида зафар қучган. У миллий терма жамоалар, Европа чемпионатлари, Чемпионлар лигаси ва клублар ўртасидаги жаҳон чемпионатлари тарихида энг кўп гол урган футболчи сифатида бир қатор рекордларга эга. 2022 йил декабридан буён Саудия Арабистонининг "Ан-Наср" жамоасида тўп сурмоқда. Карьераси давомида "Спортинг",  "Манчестер Юнайтед", "Реал" ва "Ювентус" клублари шарафини ҳам ҳимоя қилган. Роналду ҳисобида умумий ҳисобда 979 гол бор, шундан 146 таси — терма жамоа, 833 таси эса клублар таркибида урилган.