«Манчестер Сити» собиқ ўйинчиси Қатар клубига ўтиш арафасида

 Жазоир ҳужумчиси Рияд Марез яқин кунларда Қатар клубларидан бири билан шартнома имзолаши кутилмоқда.

Инсайдер Фабрицио Романо тарқатган маълумотга кўра, 35 ёшли жазоирлик футболчи «Ал-Шамал» жамоаси билан келишувга эришган. Яқин вақт ичида ҳужумчининг Қатар клубига ўтиши расман эълон қилиниши кутиляпти. Қайд этиш керакки, сўнгги уч йил давомида Марез Саудия Арабистони чемпионатида «Ал-Аҳли» шарафини ҳимоя қилган.

Ундан олдин Рияд Марез Англия премьер-лигасида «Манчестер Сити» ва «Лестер» таркибида майдонга тушган, шунингдек, Францияда «Гавр» клубида ўйнаган.

Эслатиб ўтамиз, ўтган мавсумда Рияд Марез Саудия Арабистони чемпионатида 27 та ўйин ўтказиб, 4 та гол урди ва 8 та голли узатма муаллифига айланди.