"Сўғдиёна" билан Денисов ўртасидаги келишув ярим йилда тўхтаб қолмайди"

“Сўғдиёна”нинг Виталий Денисов билан келишувга эришгани ёзги селекциядаги кам сонли топ-трансферлардан бирига айланди. Дарҳақиқат, бу янгиликни деярли ҳеч ким кутмаганди. Ҳамюртимизни Украина ва Россия клубларида муваффақиятли тўп сурганини биламиз. Охирги пайтларда Россия биринчи дивизионида тўп сурганди. 35 ёшли ҳимоячи охирги пайтларда жамоасиз эди. Ниҳоят, тажрибали футболчи бир қарорга келди ва фаолиятини Ўзбекистонда давом эттиришга қарор қилди.

Қизиқ томони, Ўзбекистон фуболчилар уюшмаси раҳбари Камолиддин Мурзоев Денисовнинг “Сўғдиёна” клубига ўтишида ва Жиззахга бориб келишида ҳамроҳлик қилган. Айтиш мумкинки, Мурзоев ҳам бевосита ушбу трансферда иштирок этди. Шу сабабли, у Виталийнинг “Сўғдиёна”га кўчиб ўтиши юзасидан ўзининг фикрлари билан ўртоқлашди.  

“Виталий таклифлар орасидан “Сўғдиёна”ни маъқул топди”

- Виталий Денисовнинг Ўзбекистонга келиш масаласига келсак, кўпчиликка сир эмас, биз олдиндан у билан дўстмиз. Ўртамиздаги муносабатларимиз анча илиқ. Бизнинг олиб бораётган ишимиздан келиб чиқиб, Денисовнинг Ўзбекистонда фаолиятини давом эттириш тўғрисида суҳбатлашган чоғимизда Денисовга ўзбек клубларидан қизиқишлар борлиги маълум бўлганди ва уларнинг орасидан “Сўғдиёна” жамоасини маъқул топди. Ўзининг хоҳишига биноан, клуб раҳбарияти билан учрашиб, “Сўғдиёна”нинг олдига қўйган мақсадларини билганидан сўнг ва айниқса, ОФК Кубогида иштирок этаётгани, кўп клубларнинг чемпионлик учун курашаётгани ҳамда уларнинг орасида “Сўғдиёна” жамоасининг ҳам борлигини инобатга олган ҳолда, жиззахликларни танлади. Натижада футболчи клуб билан ярим йиллик шартнома имзолади.

“Клуб базаси Денисовга анча ёқди”

- Тўғри, Денисовнинг Ўзбекистонга қайтиши, чемпионатимизда бундай даражадаги футболчиларнинг тўп суриши  жамоалар ўртасидаги рақобатни ошишига, мухлисларни яна стадионларга қайтаришига хизмат қилиши мумкин. Бу жараён тўғрисида айтадиган бўлсам, унга алоқага чиқишганидан кейин икки томон бир-бирига шарт-шароитларни тушунтирди. Хабарингиз бор, Улуғбек Бақоев ҳам ўз пайтида Виталий Денисов билан бирга тўп тепган. Шунинг учун жараён анча енгил кечди, десак ҳам бўлади. Жиззахга борганимизда клуб раҳбари жуда илиқ кутиб олди. Жамоа ривожи йўлида Денисовга шиддат билан ҳаракат қилишида омад тилади. Клуб базаси ҳам Виталийга анча ёқди. Жамоа учун шаҳардан алоҳида жойда машғулот майдони, бассейн, футболчиларнинг тикланиши учун барча шароитлар, умуман жамоага бўлган эътибор Денисовнинг эътиборини тортди. Бундай вазиятда клубларимиздаги профессионализмни ўсиб бораётганини айтмасдан иложимиз йўқ. Биласиз, мухлислар футболни соғинган, футболни яхши кўришади. Футболни эса бизга айнан мана шундай юлдузлар тақдим этади, деб умид қиламиз. Виталийга келажакдаги фаолиятига омад тилаймиз.

“Келишув икки томоннинг хоҳишига қараб юз берди”

- Шартноманинг ярим йилга имзолангани икки томоннинг хоҳишига қараб юз берди. Клуб ҳам Виталийни тезроқ жамоага қайтишини хоҳлаяпти. Футболчи ҳам тезроқ ўзининг оптимал формасига қайтиш ҳаракатида. Ўйлайманки, Денисов ва клуб ўртасидаги келишув ярим йилда тўхтаб қолмайди ва яна давом этади. Виталий илиқ таассуротлар билан қайтди. Тошкентдаги ўзгаришлар, футболимизни ривожланиши, 5-6 та клубни чемпионлик учун курашаётгани уни қувонтиряпти.