"Сўғдиёна" бош мураббийи: "Биз ҳеч кимни ҳайдаганимиз йўқ"

Жиззахнинг “Сўғдиёна” жамоаси Тошкентда ўқув-машғулот йиғинларини олиб боряпти. Хабарингиз бўлса керак, таркибда кутилганидек бир қатор ўзгаришлар амалга ошириляпти. Бош мураббий Ёрқин Назаров Sports.uz сайти учун жамоадаги ўзгаришлар ва қишки йиғин тайёргарлик борасидаги фикрларини айтиб ўтди.

Ноқулай об-ҳаво режага қанчалик таъсир қиляпти?

- Бундай совуқ ҳаво ҳам Худони кунлари. Бундай пайтда кўпроқ тренажёр ва мини футбол залларида шуғулланяпмиз. Бунақа об-ҳаводан ҳам фойдаланамиз. Шанба кунидан футболчиларга қисқа дам бердик, душанба кунидан яна машғулотларимизни давом эттирамиз.

Назорат ўйинлари

- Тайёргарлигимиз режа бўйича яхши кетяпти. Футболчилар битта-битта бўлиб қўшилишди. Кейинги ҳафтадан деярли 90 фоизгача ўйнайдиган футболчилар билан бирга тайёрланиб борамиз. Шунингдек, олдимизда режалаштирилган ўртоқлик учрашувлари бор. Ҳаво совиб кетгани учун бир-иккита ўйин ўтказилмади. Бундан кейинги назорат ўйинларини ташкил қиламиз, деган умиддаман. “Андижон”, “Қизилқум”, “Машъал” сингари жамоалар билан ўйнаймиз.

Селекция масаласи ҳақида

- Селекция ишларидан қониқяпман, ҳаммаси яхши кетяпти. Хабаринглар бор, янги футболчилар билан тузилаётган шартномалар бўйича хабар бериб боряпмиз. Охиргиларидан Санжар Шоаҳмедов билан шартнома имзоладик. Бельгиядан легионер ҳужумчи келди. Иккита легионер қолганди Милан Митрович билан Марко Колакович. Яна иккита янги легионер олдик. Улар ҳимоячи ва ҳужумчи.

“Сўғдиёна”дан кетган футболчилардан кўпроқ кимга ачинди?

- Жамоамизни тарк этган футболчилар ҳақида нима дейишим мумкинн? Кетгани кетди. Энг асосийси, биз ҳеч кимни ҳайдаганимиз йўқ. Қолганлари билан янги жамоа тузиб ўйнаймиз. Кимнидир кетганидан афсусланиш йўқ. Кимлар билан насиб қилган бўлса ўшалар билан ишлаймиз-да! Албатта, “Сўғдиёна” сафида 3-4 йилдан бери ўйнаётган яхши савиядаги футболчилар ҳам бор эди. Кетганлар ўрнини бошқалар билан тўлдирамиз. Жамоамиздан янги номлар чиқади.

Жасур Ҳасанов ҳақида

- Жасур Ҳасанов жамоамизда қоляпти, бу борада гап-сўз бўлиши мумкин эмас. У биз билан бирга ва тайёргарликни давом эттиряпти. Селекция ишларимиз 90 фоизга бўлди. Тўпланган таркиб билан ўйнаймиз.

Мақсад тўғрисида

- Вазифа? Шубҳасиз, яхши жамоа тузиш ва чемпионатда муносиб қатнашиш. Мухлисларимизнинг ишончини оқлаш ҳамда уларга хурсандчилик улашиш биз учун муҳим. Мақсадларимиз жиддий.

Шуҳратбек Жўраев.