"Сўғдиёна" футболчиси Бақоевнинг истеъфосидан сўнг: "Биз ҳам тушунмай қолдик"

Энди “Сўғдиёна”даги мураббий ўзгаришидан хабардорсиз. Бир неча йил давомида клубни бошқарган Улуғбек Бақоев истеъфога чиқди. Охирги пайтлардаги омадсиз ўйинлар барибир ўз таъсирини кўрсатмоқда. Жамоа аъзолари қўлдан келганича ҳаракат қиляпти, бироқ натижага келганда...

“Сўғдиёна”нинг иқтидорли ижрочиларидан бири Жавоҳир Қаҳрамонов клубдаги мавжуд ўзгариш ҳамда ҳозирги вазият ҳақида Sports.uz журналистининг саволларига жавоб қайтарди.

- Жавоҳир, Улуғбек Бақоевнинг “Сўғдиёна” клубини тарк этишини жамоа аъзолари қандай қабул қилишди? Сизлар учун ҳам бош мураббийнинг кетиши кутилмаган ҳолат бўлдими?

- Ҳаммаси кутилмаган ҳолатда бўлди. Рости, биз ҳам тушунмай қолдик. Энди нима ҳам дея олардик? Бу – футбол. Футболда ҳамма нарса бўлади. Улуғбек Бақоев албатта яхши мураббий. Нима деймиз? Шунақа бўлиши керак экан-да. Мураббийнинг кейинги фаолиятида омад тилаб қоламан ва миннатдорчилик билдираман.

- Улуғбек Бақоевнинг ўрнига вақтинча Ёрқин Назаров бош мураббий сифатида ишни бошлади. Бунга жамоадагиларнинг муносабати қандай бўлди?

- Бир нарса дея олмайман. Чунки ушбу мураббий клубга энди келди. Ҳаммасини вақт кўрсатади. Аммо мен Назаровни олдиндан танийман. Яхши мураббий ва яхши инсон.

- Бақоевнинг клубдан кетиши футболчиларга руҳий томондан оғир зарба бўлдими? Жамоа тушкун кайфиятдами ёки унчалик сезилмаяптими?

- Албатта, тушкун кайфиятга тушиб қолди. Боя айтганимдек, бу – футбол. Унда ҳамма нарса бўлади. Шунга қарамай, охирги 2 та ўйин қолди. Чемпионатни яхши ҳолатда тугатиб қўямиз, деган умиддаман.

- “Сўғдиёна” ОФК ва Ўзбекистон Кубогининг ярим финалларида пенальтилар сериясидагина аламли тарзда мағлубиятга учради. Жамоа учун ушбу иккита ўйиндаги малубият оғир зарба бўлди-а? Ўша ўйинларни эслаганда нимани айтган бўлардингиз?

- Ҳа, ОФК Кубогини бой берганимиздан кейин ҳаммани кайфияти тушиб кетди. Шундан сўнг тикланиб кетиш қийин бўлди. Тўғриси, ҳозирги пайтда биз “яма”га тушиб қолганмиз. Насиб қилса, бу кунлар ўтиб кетади, деган умиддаман.

- Клуб билан тузган шартномангиз ҳам ниҳоясига етяпти. Бақоевдан кейин сиз учун ҳам бу “Сўғдиёна”даги жорий мавсум охиргиси бўлиб қоладими?

- Олдинда 2 та ўйинимиз бор. Сиз айтганингиздек, шартномам тугаяпти. У ёғини вақт кўрсатади. Мавсум тугайверсин-чи, бироз дам олиб кейин бу саволингизга жавоб беришим мумкин. Лекин ҳозир олдиндан бир нима айта олмайман. Вақт кўрсатади.

- Сир бўлмаса, олдингизда қандай таклифлар турибди ва хориждан ҳам вариантлар борми?

- Ҳа, таклифлар бор. Хориждан ҳам, Ўзбекистондан ҳам. Аммо айни чоғда бу хусусида сизга ҳеч нима айта олмайман.

- Агар Бақоев янги мавсумда бирор-бир клубда иш бошлаб, сизни ўз жамоасига таклиф қилса, у билан яна бирга ишлаш ниятингиз борми?

- Ўйлаб кўрардим, тўғри келса (кулади).

- “Сўғдиёна”нинг жорий чемпионатдаги мақсади аниқ эди: совринли ўринлар учун курашиш. Бунинг устига юқорида айтганимиздек, ОФК ва Ўзбекистон Кубоги ярим финалларида аламли тарзда ютқазди. Хуллас, жамоа ҳеч бир вазифани уддалай олмади. Шуни ҳисобга олганда, сўнгги иккита учрашув учун футболчиларда қандай мотивация қолди?

- Насиб қилса, охирги иккита учрашувда ғалаба қозониб, ёруғ юз билан 5-ўринни олишга ҳаракат қиламиз.

- Чемпионлик қайси клубга насиб қилади, деб ўйлайсиз?

- Унисини билмадим-у, аммо 2 та учрашувда “Насаф” ютса чемпион бўлади. Шуни биламан (кулади).

- “Сўғдиёна” ўтган йили 2-ўринни эгаллаганди. Бу йил жамоага нима етишмади, деб ўйлайсиз?

- Биз учта фронтда курашдик. Ўзингиз кўрдингиз, кўпчилик толиқиб қолди. Жароҳатлар ҳам кўп бўлди. Ўйинчилар ҳам кам эди. Сабаблари шу билан боғлиқ деб ўйлайман.

Шуҳратбек Жўраев.