“Специя” қийин аҳволда. Бош мураббий Шомуродовга суянмоқчи!

“Специя” 8 апрель куни Флоренцияда “Фиорентина” меҳмони бўлади. Лигурияликлар бош мураббийи Леонардо Семпличи учун бу учрашувнинг аҳамияти катта. Чунки Флоренцияда туғилган ва айнан ма шу жойда футболчи сифатида шаклланган.

“Фиорентина” А Серияда олтита ўйиндан бери мағлубиятга учрамаяпти. Дастлаб, “Эмполи” билан очко бўлишган флоренцияликлар кетма-кет бешта баҳсда “Верона”, “Милан”, “Кремонезе”, “Лечче” ва “Интер” устидан зафар қучди.

“Специя” кучли рақиб майдонида бўладиган тўқнашув арафасида таркиб борасида катта муаммога дуч келди. Семпличи ўйинда саккиз нафар шогирди хизматидан фойдалана олмайди.

Флоренциялик мутахассис ўйин олдидан ўз фикрларини билдириб ўтди.

Ўйин ҳақида

Ҳар бир баҳснинг қиймати ортиб бормоқда. Бу йигитларга босимни оширади. Футболчиларнинг менталитетини ошириш ва сифатларини ривожлантириш усулларини топишимиз керак. Мен мавжуд муаммо ва камчиликлар ечимини тушиниб етишим керак. Бу орқали футболчиларни илк дақиқалардан беллашув охиригача энг яхши сифатларини кўрсатишига йўл очилади.

Шомуродов ҳақида

Биз кўп омилларни қадрлашимиз керак. Элдор Шомуродовнинг гол ура бошлагани нафақат ўзига, балки энг аввало, жамоа учун муҳим эканлигини таъкидлаш лозим. Мен Элдор Шомуродов, Мбала Нзола, Эммануэль Гьясидан иборат ҳужум учлигини ўйин давомида эмас, илк дақиқалардан ўйнатиш усулини қидиряпман.

Табиийки, бунинг учун ҳужумчиларнинг ўзига ҳам кўп нарса боғлиқ. Улар рақиб дарвозасига хавф солиш баробарида жамоамизнинг ҳимояланишига ҳам ёрдам бера оладиган даражада салоҳият ва маҳоратга эга бўлишлари ҳамда майдонда ҳимоянинг биринчи чизиғи сифатида ҳаракат қилишлари талаб этилади.

Биз олдиндаги учрашувларда ҳам бу футболчиларнинг бирга ўйнашига имконият яратишга ҳаракат қиламиз.

Верде ҳақида

Биз “Монако”га қарши ўртоқлик учрашувини ўтказдик. Унда Даниэле Верде энг яхши ўйинчи бўлди. Ўн кундан бери ҳолати яхши эканини кўриб турибмиз. Ўтган учрашувда уни захирага олдим. Мен шахсан ундан эмас, балки бутун жамоанинг ўйинидан қониқмаганим учун Вердени захирага олиб, уларни уйғотишга уриндим. Мен учун у ҳам муҳим ўйинчи. Бу мавсум унинг жисмоний тайёргарлигида камчиликлар бор. Қачон ўйнатиш менинг ишим.

Жамоа ҳақида

Алоҳида футболчиларни ажратиб кўрсатиш хато бўлади. Йигитларнинг ўзлари қандай хусусиятларга эга эканини ҳали тўлиқ тушуниб етгани йўқ. Жамоага келганимда италиялик бўлмаган футболчиларнинг кўплигидан ҳайратга тушган. Уларнинг ҳаммасида яхши натижалар олиб келадиган менталитет ва сифат борлигига ишонч ҳосил қилишим керак. Жамоанинг энг зўр хусусияти нимада эканини тушуниб олиш зарур.

Таркибдаги муаммолар ҳақида

Жамоадаги вазиятга ойдинлик киритиб ўтишни истайман. Агудело, Холм, Кальдара, Моутиньо, Сала, Бек, Коваленко ва Зовко бизга ёрдам бера олмайди.  Агуделода кичик жароҳат бор. Хольм сафга қўшилиб, яна танаффус қилишга мажбур бўлди. Коваленконинг иситмаси баланд. Сала ҳам машғулотда қатнашгани йўқ. Кальдара тўпиғидан зарба еган ва шикастланган. Бекнинг  товони синган. Лекин бу жамоанинг қудратига таъсир қилмаслиги керак. Ўз ўйинимизни кўрсата олишимиз муҳим. Жамоа Флоренцияда ажойиб ўйин намойиш қилишга тайёр.

Флоренция ҳақида

Флоренция менинг уйим. Шу ерда ўсиб, катта футболдаги илк қадамларимни ташлаганман. “Фиорентина”га даоим мухлислик қилганман. Уй аренасига кирганимда ҳиссиётлар жумбушга келади. Уларни Примаверада шуғуллантирганман. Трибуналарда жуда кўп дўстларим ўтиради. Ҳозир мен бошқараётган жамоага очко керак. Шунинг учун бироз уларнинг асабига тегаман.

“Фиорентина” ҳақида

Бу жамоа турли мусобақаларда кетма-кет тўққизта учрашувда ғалаба қозонди. Бир неча учрашувларини кўрдик. Баъзан хато ҳам қилиб туришади. Биз уларни хафа қиладиган вазиятлар яратишимиз керак.

Бизнеи жуда мураккаб учрашув кутяпти. Уйга яхши натижа билан қайтиш учун биринчи навбатда ўзимизни енгиб, флоренцияликлардан очко тортиб олишимиз лозим. Бунинг учун шогирдларимнинг ҳар бири 30 ёки 45 дақиқа эмас, балки бутун учрашув давомида ўзини кўрсатиши талаб этилади.

"Фиорентина" ва "Специя" ўртасидаги учрашув 8 апрель куни Тошкент вақти билан соат 17:30 да бошланади.  

Шомуродовни бошқа футболчига алмаштиришмоқчи!