Sport TV журналисти: "Жаҳон чемпионатида Ўзбекистоннинг гуруҳдан чиқа олишини кутяпман"

Хабарангиз бор, бугун 2026 йилда бўлиб ўтадиган Жаҳон чемпионати учун қуръа ташланади.

Sports.uz сайти мазкур мусобақада Ўзбекистон терма жамоасининг иштирок этиши мавзусида Sport TV журналисти Зуҳриддин Қиличев билан қисқа интервью уюштирди.

Ўзбекистоннинг гуруҳ босқичидаги рақиблари кимлар бўлади?

"Ассалому алайкум. Ўзбекистон учун тарихий Жаҳон чемпионатига қуръа ташланмоқда. Албатта, миллий терма жамоамизнинг қайси гуруҳдан ўрин олиши жуда қизиқарли.
Тахминларимча, 1-саватчадан мезбон жамоалардан бири ҳисобланмиш АҚШ, Канада ёки Мексикадан бири. 2-саватчадан эса Жанубий Америка терма жамоаси — Уругвай. Сўнгги саватчадан Кюрасао терма жамоасини кутяпман.
Мабодо мазкур қуръа ўхшаса, Ўзбекистон терма жамоамиз гуруҳдан чиқа оларди, деб ўйлайман. Ўзи гуруҳдан чиқиш учун 1 та ғалаба ҳам етарли бўлиши мумкин. Албатта, вазиятга қаралади, сабаби 3-ўрин соҳиблари ҳам кейинги босқич йўлланмасини қўлга киритади."

Мундиалда қайси босқичгача етиб бора оламиз?

"1-саватчадан жудаям кучли терма жамоалардан бири, 2-саватчадан эса Хорватия билан тушсак, сўнггисида плей-офф босқичи орқали йўлланма олган терма жамоалар бизга рақиб бўлса, гуруҳдан чиқиш имкониятимиз пасаяди. Лекин мен Ўзбекистон терма жамоасининг айнан шу форматда Жаҳон чемпионатида гуруҳдан чиқа олишини кутяпман. Қайси босқичга етиб боришини тахмин қиладиган бўлсам — 1/16. Биз учун шу охирги нуқта бўлади."

Сизнингча, Жаҳон чемпионатида таркибимиздаги футболчилардан кимлар порлаб, кучли чемпионатларга йўл олиши мумкин?

"Биринчи навбатда етакчиларимиз ўзларини кўрсатишлари керак. Жаҳон чемпионати — катта майдон. Остон Ўрўнов жароҳат олмай, соғ-саломат бўлиб турса, формасини янада яхшиласа, ёрқин ном қолдириб порлашини кутяпман. Шунингдек, Элдор Шомуродов, Аббосбек Файзуллаев ва Абдуқодир Ҳусанов Жаҳон чемпионатида энг камида ўз даражасида ўйнаб беришлари керак бўлади.
Хуллас, биз учун тарихий бўлган Жаҳон чемпионатининг бошланишига оз қолди. Ўйлайманки, ўзбек футболи учун айнан шу Жаҳон чемпионати катта бурилиш нуқтаси бўлади ва кўплаб иқтидорли футболчиларимиз Европанинг топ клубларига йўл оладилар. Энг муҳим ютуғимиз — истеъдодларимизнинг дунёнинг топ клубларига ўтиши."