Сречко Катанец Қирғиз Республикаси терма жамоаси устидан қозонилган ғалабадан сўнг нималар деди?

Бугун "Navruz Cup-2022" халқаро ўртоқлик турнирининг ярим финалида Ўзбекистон терма жамоаси қўшни Қирғиз Республикаси терма жамоасига қарши баҳс олиб борди ва 3:1 ҳисобида ғалаба қозонди.

Ушбу учрашувдан сўнг ўтказилган матбуот анжуманининг иккинчи қисмида Ўзбекистон тетрма жамоаси бош мураббийи Сречко Катанец иштирок этди ва ўз фикрларини билдириб ўтди.

-Ўйин ҳақида таассуротларим яхши. Футболчиларни ғалаба билан табриклайман. Улар жуда яхши ўйнашди. Футболчилар жудаям шиддатли ўйин кўрсатишди. Биз жуда ҳам кўп имкониятлар яратдик. Гарчи биринчи бўлимда гол ўтказиб юборган бўлсакда, мен ўйиндан қониқиш хосил қилдим. Афсуски, биринчи бўлимда имконятларимиздан фойданала олмадик. Иккинчи бўлимда биз темпни янада оширдик ва ғалаба қозондик.

Албатта биринчи бўлиб гол ўтказиб юбориш шокка туширади, аммо бундай ҳолатлар футболда учраб туради. Агар мухлислар биздан жуда кўп нарса кутишган бўлса, айтишим мумкинки футболда ҳамма нарса бўлиши мумкин. Ўйиндан олдин жуда кўп нарсани кутмаслик керак. Қолаверса ҳар бир рақибга ҳурмат билан муносабатда бўлиш керак. Италия терма жамоаси кимга ютқазганини биласизларми? Футболда ҳамма нарса бўлиб туради.

Ҳозирги футбол 10 йил олдинги футбол эмас. Кичкина терма жамоаларга қарши 7:0, 8:0 деган нарса энди бўлмайди. Чунки футбол жуда ҳам тез ривожланяпти. Агар биз ФИФА рейтингида 200-ўриндаги терма жамоага қарши ўйнасак, бунга ҳам жиддий ёндошишимиз керак.

Мухлислар терма жамоани 90 дақиқа қўллаб-қувватлаши керак ва ўз навбатида футболчилар буни ҳис қилишлари керак. Бугун стадиондаги мухлисларнинг ҳайқириқларидан майдонда "Навбаҳор" ўйнадими ёки Ўзбекистон терма жамоасими, тушунмай қолдим. Шунинг учун илтимос, ким Ўзбекистон терма жамоаси ўйинларига келса, охиригача фақат терма жамоани қўллаб-қувватласин.