"Суперлига-2020". “Навбаҳор” Намангандаги ўйинларда мағлубиятга учрамади

Хабарингиз бор, Ўзбекистон кубогининг чорак финалидан ўрин олган баҳсда “Насаф”га имконият бой берилганидан сўнг, "Навбаҳор" учун жорий йилги мавсум якунланди. Coca Cola Суперлига баҳслари эса, 3 декабрь куни ўз ниҳоясига етганди. 

“Лочинлар”нинг кўпчилик мухлислари миллий чемпионатимизнинг якунланган мавсумдаги статистик натижалари қизиқтиради. Клуб матбуот хизмати жамоа статистикасини тақдим этди.

Якунланган мавсумда жамоа 26 та учрашув ўтказиб, 8 та ўйинда ғалаба қозонди, 11 та баҳсда дурангга эришиб, 7 та ўйинда мағлубиятга учради. Тўплар фарқи – 24-21 ни ташкил этган ҳолда, “Навбаҳор” жами 35 очко тўплади ва якунда турнир жадвалида 8-ўринни эгаллади.

Эътиборлиси, "Суперлига – 2020"да “лочинлар” Наманганда, яъни ўз уй учрашувларини ўтказадиган “Марказий” ўйингоҳда мағлубиятга учрамаган.

“Навбаҳор” Намангандаги 11 та баҳснинг 6 тасида зафар қучиб, 5 та ўйинда дурангга имзо чекди ҳамда ўз майдонидаги учрашувларда жами 23 очко тўплади. Бу ўйинларда “лочинлар” рақибларига 12 та гол уриб, ўз дарвозасидан 3 та тўп ўтказиб ўтказиб юборди.

Жамоа сафарда ҳам 11 учрашув ўтказиб, 2 ютуқ, 4 дуранг ҳамда 5 мағлубиятни қайд этган ҳолда, жами 10 очко тўплади. Наманганликлар 10 та гол уриб, ўз дарвозаларидан 14 та тўп ўтказди.

Хабарингиз бор, карантин сабабли, Суперлиганинг 10-13-турлардан ўрин олган баҳслари марказлашган ҳолда, Тошкентда ўтказилди. Мазкур 4 ўйинда “Навбаҳор” 2 дуранг ҳамда 2 мағлубиятни қайд этиб, жами 2 очко эгасига айланди.

Нейтрал майдонларда бўлиб ўтган ўйинларда “лочинлар” 2 та тўп киритиб, ўз дарвозасидан 4 та гол ўтказди.