Суперлига. 7-турнинг 7 та ўзига хос жуфтликлари ҳақида

Бугун Суперлиганинг 7-турига старт берилади. 11 майда бошланадиган учрашув 14 май куни ниҳоясига етади. Бу турда ҳам сиз билан бизни бир қанча муҳим ва қизиқарли баҳслар кутмоқда. Айниқса, водий дербиси ҳамманинг эътибор марказида.

11 май

19:00. “Олимпик” – “Пахтакор”

7-тур Тошкент дербиси билан бошланади. Яқинда Олимпиада йўлланмасини қўлга киритган Ўзбекистон U23 терма жамоамиз бош мураббийи Тимур Кападзе энди эътиборини “Олимпик”даги ишига қаратган. “Пахтакор”га қарши бўладиган учрашувда “Олимпик” энди тўлиқ таркибда ўйнай олади. Чунки терма жамоадаги ўйинчилари ҳам клуб ихтиёрига қайтишган. Таркиби анча ёшарган “Пахтакор”га ҳозирча барқарорлик етишмаётганини кўриб турибсиз. “Шерлар” бу рақибини чемпионатда фақат бир марта ютган холос. Дербида исталган натижа содир бўлиши мумкин.

19:00. “Металлург” – “Қизилқум”

11 майга белгиланган яна бир учрашув Олмалиқ шаҳрида ўтказилади. У ерда номинал мезбон ҳисобланган “Металлург” “Қизилқум”ни қабул қилади. Ўтган турда иккала клуб оғир ўйинларини ўтказдилар. “Металлург” Тошкентда “Пахтакор”га 4:3 ҳисобида ютқазди. “Қизилқум” эса Қаршида “Нефтчи”ни қабул қилиб 90+3-дақиқада мағлубиятдан қутулиб қолди. “Металлург” ва “Қизилқум” бир-бирига мос рақиблар. Балки кучлар тенг келар, яна ким билсин?!

12 май

19:00. “Нефтчи” – “Андижон”

Турнинг марказий ўйини Фарғонада бўлиб ўтади. Унда водий дербиси доирасида “Нефтчи” ён қўшниси “Андижон”ни қабул қилади. Биласизми, “Андижон” мазкур дербига мусобақа пешқадами сифатида келмоқда. “Нефтчи” бир ўйин кам ўтказган ва 10 очко билан 4-поғонада жойлашиб турибди. “Андижон”да эса 6 та ўйиндан сўнг 11 очко мавжуд. Ўтган турда “Бургутлар” ўз майдонида “Сўғдиёна”га ютқазиб қўйгач, бу мағлубият тасодифлигини “Нефтчи” билан учрашувда исботлаш иштиёқидалар. Фарғоналиклар эса Қаршида “Қизилқум” билан ўйинда тайёр ғалабани қўлдан чиқариб юборди. “Нефтчи” -  “Андижон” қарама-қаршилиги ҳақида ортиқча таърифга ҳожат йўқ. Майдонда қаттиқ жанг кечади, натижасини эса ҳакамнинг сўнгги хуштагидан кейин билиб оламиз.

19:00. “Сўғдиёна” – “Навбаҳор”

Ҳар иккала жамоа ўтган турда ўзлари учун жуда ёқимли ғалабаларни қўлга киритишди. Рости, Жиззахда бўладиган “Сўғдиёна” – “Навбаҳор” ўртасидаги учрашувга ҳам қизиқиш жуда юқори. Иван Бошкович ва Самвел Бабаян ўртасидаги дуэлда ким ғолиб чиқиши қизиқ. Бошкович “Сўғдиёна” мисолида иқтидорли ёшлардан ажойиб жамоа тузмоқда ва улар охирги учта турдан бери ютиб келмоқда. Сўнгги марта илк турда “Нефтчи”га ютқазган. Шундан кейин иккита дуранг ва учта ғалаба қайд этди (Кубокдаги натижалари инобатга олинмаган). Хуллас, “Сўғдиёна” яхши формада. Хўш, бу уларнинг “Навбаҳор”ни енгишига сабаб бўлармикин?

13 май

19:00. “Насаф” – “Бунёдкор”

Бу жуфтликда кўпчилик “Насаф”нинг ғалабасига шубҳа қилмаётгандир. Айниқса, “Бунёдкор”нинг ҳозирги мураккаб аҳволга тушиб қолгани фонида уларга балки ачиниш ҳисси ҳам мухлисларда пайдо бўлаётгандир. Чемпионат яқинда бошландию, аммо “Бунёдкор”да учинчи марта бош мураббий ўзгарди. Шунинг учун клубда ҳали ҳам ғалаба йўқ. “Бунёдкор”нинг ўз номи ва ўз ўрни бор. Табиийки, жадвалда охирги ўриндалиги ярашмаяпти. Вазият шундай тус олдики, агар “Насаф”ни ютадиган бўлса, бу энди сенсация сифатида қабул қилинадиган аҳволга етиб келди. “Насаф” ҳозир ҳар жиҳатдан “Бунёдкор”дан кучли. Навбатдаги янги бош мураббий Зейтуллаев дебютида “Сурхон”га ютқазди. Кўрамиз, у жамоасини “Насаф”га қарши қандай тайёрлаяпти экан?

19:00. “Сурхон” – “Динамо”

Яхши ўйин бўлади. “Сурхон” учта турдан бери ютқазмаяпти. 1 дуранг ва 2 ғалабага эришди. Вадим Абрамов бошчилигидаги “Динамо” ўтган турда мажбурий дам олди. “Олимпик” билан баҳси қолдирилди. Шунинг учун улар бор эътиборини “Сурхон” билан баҳсга қаратганлар ва рақибдан кўра кўпроқ дам олиш имкони ҳам бўлган. Аммо “Сурхон” “Андижон”га ютқазганидан кейин ўзига келди ва ўйинини яхши томонга ўзгартира олди. “Динамо” Кубок баҳсларида гарчи гуруҳда қолган бўлса-да, ўз ўйини билан кўпчиликда яхши таассурот қолдирди. “Сурхон”га қарши самарқандликлар ҳужумкор футбол кўрсатишади. Абрамов шуни ёқтиради. Демак, голларга бой ўйин кўрсак ажаб эмас.

14 май

19:00. “Локомотив” – ОКМК

Ўтган турда иккала клуб 4 тадан гол ўтказиб юборди. Умуман олганда, “Локомотив” ҳам, ОКМК ҳам сўнгги иккита турдан бери мағлубиятга учраб келишмоқда. Бу ҳам дерби мақомидаги беллашув. “Локомотив”ни бошқараётган Александр Стоймирович ўтган йили ОКМКда Миржалол Қосимовнинг мураббийлар штабида жисмоний мураббий сифатида ишлаётганди. Энди у собиқ клубига қарши жамоасини ғалаба иштиёқида тайёрлаяпти. “Локомотив”га ҳам, ОКМКга ҳам уч очко жуда зарур. Лекин ҳар икки клубнинг мудофаа чизиғида заифликлар кўзга ташланиб турибди. Бўлажак учрашувда ҳам кўп нарса ҳимоячиларнинг қанчалик ишончли ўйин кўрсатишига боғлиқ.

Шуҳратбек Жўраев.