Суперлига қачон давом эттирилади?

Хабарингиз бор, коронавирус пандемияси сабаб юртимиздаги барча оммавий тадбирлар, жумладан футбол учрашувлари ҳам тўхтатиб қўйилган эди. Эндигина старт олган Суперлига ўйинлари қачон давом эттирилиши борасида эса Ўзбекистон профессионал футбол лигаси бош директори ўринбосари Диёр Имомхўжаев ўз телеграм саҳифасида маълум қилди.

"Энг кўп берилаётган шу саволга аниқ жавоб берадиган кимдир йўқлигини айтмоқчи эдим. Менда жавоб йўқ, директоримда ҳам, ундан тепароқдагисида ҳам. Ҳолат шундайки, вазият ўнгланиши бандасининг қўлида эмас.

Биз албатта РУХСАТ, деган хитобни кутамиз. Аммо ундан муҳимроғи, барчамизнинг саломатлигимиз.

P.S. Ҳақиқий профессионал футболчилар чемпионат давом эттирила бошлагач кўринади. Улар ўз формасини лозим даражада ушлаб тура олмаслиги кундек равшан. Аммо шундай бўлса-да, ўзини қўйиб юбормаган ва нима қилиб бўлса-да, формасини ушлаётган футболчиларга кейинроқ майдонда осон бўлади", - деб ёзади Имомхўжаев.