Суперлига. "Ёнадиган" 11- тур ҳақида

Суперлигада 11- тур бугундан старт олиши режалаштирилган. Бу ҳафтадаги баҳсларни 19:00 да бошланадиган "Андижон" - "Сурхон" ўйини очиб беради. Одатдагидек тур олдидан беллашувларга таҳлилий кўз билан назар солиб чиқамиз.

"Андижон" - "Сурхон"

Янги мураббий қўл остида илк баҳсини ўтказган водийликлар жадвалнинг энг қуйи поғонасидаги "Шўртан"га меҳмонда мағлуб бўлишди. Тўғри беллашувда ҳакамлар томонидан бироз баҳсли қарорлар қабул қилинди. Лекин, кўплаб экспертлар ўйин 11га 11 давом этганда ҳам "Андижон" ўша кунгидан яхшироқ ҳаракат қила олмасди, деганлари ҳам "бургутлар"нинг ўйин сифати анча тушиб кетганини исботлаб тургандек, гўё. Клуб Суперлигада 5-турдан бери ғалаба тугул, дуранг нималигини билмай келмоқда.

"Сурхон"да эса сўнгги учрашувларда яхши томонга ўзгаришлар кўзга ташланмоқда. Клуб охирги 3 та турда "Сўғдиёна" ва "Пахтакор"ни ютган бўлса, "Динамо" га меҳмонда тенг курашлар остидаги ўйинда мағлубиятга учради. Беллашув "Бобур Арена"да ўтказилиши бироз Шацких шогирдларига имконият қўшади. 

"Насаф" - ОКМК

Қайд этиб ўтиш лозимки, бекорга бу икки баҳс биринчи кунга қўйилмаган. Қолган жамоалар учун бу тур ФИФА кунларидан олдинги охирги учрашувлар бўлса, " Андижон" ва "Насаф" 27 май куни Ўзбекистон Суперкубоги учун ўзаро жангга киришиши кўзда тутилган. Тўғри, қаршиликлар Суперкубоги учун марказий баҳсни қурбон қилиб юборишмас, лекин хаёлларининг бир четида мавсумдаги илк кубокни ютиш имконияти туриши табиий. Бу ОКМКга фойдага, "Насаф"га эса зарарга ишлаб қолиши мумкин. Шу сабабли, деярли чемпионликни ҳал қилиб берувчи ўйинга таҳлилни учрашув тугагач амалга оширганимиз маъқулроқ. 

"Нефтчи" - "Шўртан"

Олмалиқдан қийинчилик билан очко олиб қайтган фарғоналиклар уйларида ҳар қандай ҳолатда ҳам жадвалда охирги ўринда бораётган ғузорликларни мағлуб қилишга интилади. "Шўртан"да эса "янги ҳаво" эффект беришни бошлагандек. 8-турдан сўнг Анвар Бердиев ўрнига жамоани қабул қилган Элдор Мойлиев охирги икки турда 4 очко жамғаришга эришди. Бундан олдин клуб 8 учрашувдан фақатгина 1 очко жамғаришга муваффақ бўлган эди.

Левченко ҳамда Ҳайдаров ўртасида тактик жангларни ҳам кўргимиз бор. Баҳром Ҳайдаров захирадан тўғри алмаштиришлар қилиши мумкинлигини олдинги баҳсларда кузатдик. Ушбу дербида-ку, аниқ ғалаба ўйинга қўшимча кучлар кирита олган жамоа томонида бўлади.

"Пахтакор" - "Хоразм"

"Пахтакор" қайтяпти ёки қайсидир баҳсдаги мағлубият жамоани яна эски ҳолига тушириб қўярмикин. Буни ўша ютқазиқдан сўнг билиб олсак бўлади. Лекин, бу айнан "Хоразм" билан ўйинда содир этилиши қийин. Тўғри, хоразмликлар ўтган турда "Машъал"ни йирик ҳисобда ютишди. Аммо, айни шу туфайли, "Пахтакор"дан ҳам очко олиб қўяди, дейиш бироз хато, назаримда. Сергеев формага кириб олди ва кўп эҳтимол миллий жамоага Шомуродовга рақобатчи сифатида таклиф этилади. Ойни супер даражада ўтказиб берган Муҳаммадали Ўринбоев ҳам номзодлар орасига қўшилиб олиш учун "Хоразм"га қарши бор кучи билан ҳаракат қилади.

"Динамо" - "Қизилқум"

Самарқандликлар кўпчилик наздида кутилмаганда "Бухоро"га қарши учрашувда очко йўқотди. Ўйинни кўрганлар ҳам буни эътироф этишаётганидан келиб чиқсак, ростдан шунақа. "Қизилқум" билан баҳсдаги қониқарсиз натижа "Динамо" аъзолари ўз натижаларидан "ҳаволаниб кетибди", деган баъзи экспертларнинг гапларини авжига чиқаради. Шу сабабли, Абрамов шогирдлари 10 та турда мағлубият нелигини билмай келаётган кўҳна шаҳар жамоаси навоийликларга қарши ҳам бу анъанани давом эттирса керак. Никола Лазаревич шогирдлари эса кетма-кет икки салбий натижадан сўнг ушбу беллашувга етиб келишяпти. Клуб 10-турда "Пахтакор"га ҳеч нарса таклиф қила олмаган эрса, ҳафта ўртасида кубокда "Қўқон"га ҳам ютқазди. Шу боисдан, руҳий устунлик Вадим Абрамов шогирдларида бўлиши табиий. 

"Машъал" - "Бунёдкор"

Ваниҳоят турнинг сўнгги ўйинига етиб келдик. Ўтган турдан олдинги "Машъал" ҳақидаги сўзларимиз ҳамон актуал бўлиб турибди. Клуб ҳали ҳам ўзининг Суперлигада эканлигини ҳис эта олмаяпти. Жамоа ўзи билан бирга Про лигадан олий дивизионга чиққан "Хоразм"га йирик ҳисобда ютқазаётгани буни исботлаш учун етарли. "Бунёдкор"га эса юқорида "Динамо"га айтилган гаплар авж олиб улгурди. Бу статистикада ҳам акс этишни бошлади. 8-тургача мағлубиятсиз кела олган "қалдирғоч"лар сўнгги 3 турда иккита салбий натижа қайд этишди.

 

Яҳёхон Ғаниев