Суперлигадан таклиф бўлмади, ҳар ким ҳам 32-33 ёшда легионер бўла олмаса керак - Артём Филипосян яна собиқ клубига қайтгани ҳақида

Ўзбекистонлик футболчилар орасида хорижда легионер сифатида тўп сураётганлари талайгина. Улар турли мамлакатларда фаолият олиб боришяпти. Бугун ана шундай ўйинчиларимиздан бири ҳақида сўз юритамиз.

Ёдингизда бўлса, яқинда ҳамюртимиз Артём Филипосяннинг Индонезиядан қайтиб келгани ҳақида хабар бергандик ва у “Локомотив” клубининг машғулотларида иштирок этаётгани борасида ҳам маълумот бергандик. Эндиликда унинг қайси клубда тўп суриши аниқ бўлди.

Sports.uz сайтининг аниқлашича, Филипосян Таиланд чемпионатида тўп суради. Бу албатта биринчиси эмас. Ўтган йили ҳам Артём у ерда фаолият олиб борган. Қизиғи шундаки, айнан ўтган мавсумдаги собиқ клуби - “Прачуап”га қайтган. Футболчимиз ўз клубига эга бўлгач, дастлаб sports.uz мухбирига бу борада ўз муносабатларини билдирди.  

-  Индонезиядан қайтишдан аввал клуб раҳбарлари мен билан шартномани узайтиришни хоҳлашганди. Лекин ҳали у ерда мавсумни давом эттириш ёки эттирмаслик аниқ эмасди. Пандемия туфайли тўхтатиб қўйилганди. Бироқ мен улар таклиф қилган шартномага рози бўлмадим. Чунки улар 25 фоиз тўлаяпти. Ундан кўра уйга қайтганим яхши эди. Ўзбекистонга келганимдан сўнг, менга Аднан Ораховацдан хабар келди. У менга шартномам бор ёки йўқлигини сўради. 31 декабрда битим ўз кучини йўқотишини айтдим. Шунда менга, бош мураббий сенга яна қизиқяпти, келишга розимисан, деб сўради. Майли, шартнома масалаларини келиша олсак боришимни айтдим. Фақат улар ҳозирча тўрт ойга деб айтишди. Шундай қилиб, “Прачуап” бош мураббийи билан алоқага чиқдик ва биз ҳаммасини келишиб олдик. 2019 йили ҳам Таиландда тўп сургандим ва ўшанда яхши таассурот қолганди. Бу мен учун бегона эмас. Чемпионатини яхши билардим. Ҳар ўйинда стадион мухлислар билан тўлади, ВАР тизими ишлайди, ўйинлар жиддий кечади. Хуллас, Таиланд футболидаги муҳит ёққани учун қайтишга рози бўлдим. “Прачуап” ҳозир охирги ўринлардан бирида кетяпти. Мураббий эса ёрдам беришимни сўради. Уни ҳам ҳурмат қиламан. Бу ерга 16 декабрда етиб келдим ва 14 кунлик карантиндаман. Насиб бўлса, 31 декабрда жамоамга қўшилиб, машғулотларни бошлайман. 9 январда ўз уйимизда иккинчи давранинг иккинчи турини ўтказамиз, - дейди футболчи.

Шу ўринда Артёмдан яна нега хорижга кетгани ҳақида сўрадик. Индонезиядан қайтганидан сўнг, балки энди ўзимизнинг чемпионатда тўп суришини кутгандик. Лекин кўриб турибсизки, яна легионерга айланди. Ёки Филипосянга Суперлига клубларидан таклифлар бўлмадими?

-  Тўғрисини айтсам, менга ўзимиздан қизиқишлар бўлмади. Сабаби, қайтганимни кўпчилик билмасди. Фақат у ердан, бу ердан оғзаки эшитиб юрдим. Менга ҳеч кимдан таклиф бўлмади. Асосан Индонезиядаги клубим менга янги шартнома таклиф қилганди, лекин боя айтганимдек, улар билан келиша олмадик. Уйда оилам даврасида хордиқ чиқараётган пайтимда Таиланд варианти пайдо бўлди. Улар билан шартнома тузиб бўлгач, энди бошқа бўладиган таклифларни ўйлашга ҳожат йўқ.

Умуман айтганда, тажрибали ҳимоячи учинчи йилдирки, четда ўз омадини синашга қарор қилди. Кўринишидан унга легионер бўлиб тўп суриш анча ёқиб қолганга ўхшайди. Аммо унин ёшига қарайдиган бўлсак, бу анча яхши натижа ҳисобланади.

-  31 ёшимда легионерга айлангандим. Икки йил четда ўйнадим ва 6 январда 33 га тўламан, - дея мавзуни давом эттирди, Филипосян. - Учинчи йили ҳам яна легионер сифатида тўп сураман. Охирги уч йил давомида ўз устимда жиддий ишладим, машғулотларда ҳам бор кучимни бердим. Спорт формамни яхши ҳолатда ушлаб турибман. Ёшингиз ўтиб боргани сари сиз шунга яраша янада куч тўплашингиз керак. Ахир ҳар ким ҳам 32-33 ёшда четда тўп сура олмаса керак?! Кетма-кет учинчи бор хорижда тўп суришимдан хурсандман. Бу ҳар томонлама яхши. Табиийки, Ўзбекистон чемпионатидан чиқиб кетганимга ҳам уч йил бўлади. Шунчаки, менга Таиланд чемпионати ёқди. Ҳозирги кунда Ўзбекистон чемпионатидан Таиланд биринчилиги устун, шароитлар бўйича ҳам. Бу оилам учун ҳам яхши. Таиланднинг ҳар бир клубида бештадан легионер бор. Бизнинг клубларнинг ҳаммасида ҳам легионерлар тўлиқ эмас. Агар хорижлик яхши ўйинчилар кўпайса чемпионатимиз янада қизиқарли кечади. Аммо доим ўзимизнинг чемпионатимизни қолдирмай кузатиб бораман. Айниқса, илгари ўзим тўп сурган клубларнинг натижаларига бефарқ эмасман. Барибир ўзбекистонлик футболчиман, шу боис чемпионатимизни кузатишга ҳаракат қиламан.

Бу йилги мавсум унинг учун кўпчилик қатори кўнгилдагидек кечмади. Айниқса, чемпионатнинг катта қисмини ўйин амалиётисиз ўтказишига тўғри келди. Қизиқ, ҳамюртимиз қисқа вақт давомида қандай қилиб спорт формасини тиклаб оларкин?

-  Индонезияга борганимда бошида ҳаммаси жойида эди. Фаолиятимни у ерда давом эттириш хато бўлди, деб ўйламайман. Индонезияда биз аввалига учта турда иштирок этдик. Эсимда, охирги турда рамзий терма жамоасига ҳам киргандим. Пандемия сабабли чемпионат қолдирилганди. 7-8 ой машғулотлар ўтказдик. Эртага нима бўлишини ҳеч ким билмайди. Масалан, Таиландда чемпионат давом эттирилди. Агар Индонезияда ҳам футбол тўхтатилмаганида яхши натижаларга эришиш мумкин бўларди. Ҳаёт давом этади. Ҳаммаси изига тушяпти. Тўғри, менда ўйин амалиёти бўлмади. Аммо ўз устимда ишлашда давом этяпман. Уйга қайтганимдан кейин “Локомотив” жамоаси билан машғулотларда қатнашиб турдим. Бунинг учун клуб мураббийлари ва раҳбарларига миннатдорчилик билдираман. Сабаби, улар менинг шуғулланишимга рухсат беришди. Ўйин амалиётига келсак, бу борада у қадар қийналмайман деб ўйлайман. 33 ёшда ҳар бир футболчининг тажрибаси бўлади. Фақат жисмоний томондан бироз қийналишим мумкин. Чунки югурмаганмиз. Лекин 14 кунлик карантинда ҳам меҳмонхонада ҳар куни кунига бир соатдан ўз устимда ишлаяпман. Тренажёр залида шуғулланяпман. 31 декабрда клубга қўшилсам олдимда яна 10 кун вақт бўлади. Ҳаммаси ўзимга боғлиқ. Яна спорт формамга қайтишга ва жамоамга ёрдам беришга ҳаракат қиламан. Ўйиндан-ўйинга кучайиб борамиз. “Прачуап” жамоаси Таиланд чемпионатида иштирок этяпти. Ўтган йили Кубок финалида “Бурирам Юнайтед”ни ютгандик, бу ажойиб натижа эди. Ўшанда яна бир мақсад 10 таликка кириш эди, биз 9-ўринни олдик. Бу кичкина жамоа бўлгани учун юқори мақсадлар қўйилмайди. Чунки клуб ҳали медаллар учун курашишга тайёр эмас. Ҳозир эса “Прачуап” бироз қийин аҳволда ва элитада қолиш учун курашяпти. Бу жамоадан менга таклиф тушганида рози бўлдим. Нимага? Чунки қандай натижа кўрсата олишимни синаб кўриш қизиқ туюлади. Ўзим ҳам мана шундай қийинчиликлар билан курашишни ёқтираман. Ёшлигимдан ютқазишни ёмон кўраман. Бу ерга яхши ниятлар билан келганман. Жамоа билан биргаликда “Прачуап”ни олиб қоламиз ва бунинг уддасидан чиқамиз. Ўзим ҳам ҳар хил ҳолат ва шароитларга тайёр тураман. Менга шундай чақирув бўлдими, бу мен учун синов ва бундан муваффақиятли ўтишим керак. 26 декабрда иккинчи давра бошланади. 20 март куни эса чемпионат тугайди. Раҳбарият ва мураббийларнинг маълум қилишича, агар клуб элитада жон сақлаб қолса, менга яна янги шартнома беради. Улар билан шундай шарт асосида келишувга эришдик. Аввало клубни сақлаб қолишга ҳаракат қиламиз. Ўзимга ҳам Таиланд чемпионати ёқади. Аднан Ораховац орқали эшитиб турибманки, фан-клуб менинг келганимдан хурсанд бўлган. Ўз ўйиним билан мухлисларнинг меҳрини қозонишга яна ҳаракат қиламан. Фейсбук ва инстаграмда менинг келганим ҳақида ёзишибди. Маҳаллий ишқибозларнинг мени қадрлаб, ҳурмат қилишганидан хурсанд бўлдим, - деди Артём.