Суперлиганинг сўнгги турини "ёндирган" футболчилар кимлар?

Суперлиганинг сўнгги 26-тури турли натижаларга бой бўлди. Чемпионатнинг якунловчи турида олқишларга сазовор бўлган ва энг яхшисига айланган футболчилар алоҳида эътирофга муносиб.

ОКМК – “Қизилқум” – 1:0. Энг яхши футболчи: Ойбек Рустамов

Миржалол Қосимов жамоаси ўзи учун жуда муҳим ўйинда уч очкони қўлга киритди ва чемпионатни иккинчи ўринда якунлаб, кумуш медалга сазовор бўлди. ОКМКнинг муҳим ўйинида муҳим ғалаба қўлга киритилиши учун муҳим бўлган ягона голни урган Ойбек Рустамов учрашувнинг энг яхши футболчиси бўлди.

“Навбаҳор” – “Андижон” – 3:3. Энг яхши футболчи: Жамшид Искандеров

Водий дербисида жанговар дуранг қайд этилганидан хабардорсиз. Мезбонлар худди Кубок финали каби бу сафар ҳам 2:3 ҳисобида ютқазиши мумкин эди. Бироқ охирги сонияларда мезбонлар мағлубиятдан қутулиб қолдилар ва якунда бу дуранг “Навбаҳор”га бронза медалини тақдим қилди. Учрашувда пенальтидан гол урган ва голли пасни узатган Жамшид Искандеров бу сафар ҳам энг яхшиси сифатида эътироф этилди.

“Бунёдкор” – “Пахтакор” – 2:0. Энг яхши футболчи: Андрия Филипович

Тошкент дербисида “Бунёдкор” ниҳоят “Пахтакор”ни мағлубиятга учратишга муваффақ бўлди. Бу орқали “Қалдирғочлар” плей-офф зонасидан қутулиб қолди ва Суперлигада тўғридан-тўғри жон сақлаб қолишга муваффақ бўлди. “Бунёдкор” легионери Андрия Филипович биринчи бўлимда ҳисобни очди ва бу мезбонларга қўшимча иштиёқ бағишлади. Унинг ўзи эса учрашувни анча ишончли тарзда ўтказди ва шу боис ҳам Филипович мақтовларга сазовор бўлди.

“Сурхон” – “Олимпик” – 3:0. Энг яхши футболчи: Хумоюн Шербўтаев

“Сурхон” клуби охирги турда “Олимпик”ни 3:0 ҳисобида мағлубиятга учратиб ишқибозларини хурсанд этди. Биринчи бўлимда битта, иккинчи бўлимда иккита гол урган “Сурхон” шу тариқа мавсумни яхши нотада якунлади. Жамоанинг иқтидорли ярим ҳимоячиси Хумоюн Шербўтаев киритилган голларда бевосита иштирок этди ва рақибга жиддий муаммоларни туғдирди. У энг яхши ўйинчи бўлишга чиндан ҳам лойиқ.

“Насаф” – “Металлург” – 1:2. Энг яхши футболчи: Забиҳилло Ўринбоев

“Металлург” учун мавсумнинг охирги турида кичик мўъжиза юз берди. Бекободликлар Қаршида амалдаги чемпион “Насаф”ни мағлуб этиши, Тошкентда “Локомотив” “Нефтчи”га ютқазиши керак эди. Ана шунда “Металлург” лигада қолиш имкониятини сақлаб қолган бўларди. Буни қарангки, амалда ҳам шундай бўлиб чиқди. Аввало, “Металлург”ни характерига қойил қолиш керак. “Насаф” майдонида аввалига ҳисобда ортда қолаётганига қарамай, кейинчалик иккита гол уриб ғалабани илиб кетишди. Жамоа етакчиси ва сардори Забиҳилло Ўринбоев катта ҳажмдаги ишни бажарди ва доимгидек ўз маҳоратини намойиш қилишга эришди.

“Локомотив” – “Нефтчи” – 2:3. Энг яхши футболчи: Билолхон Тошмирзаев

“Нефтчи” сўнгги турда иродали ғалабани қўлга киритди. “Локомотив”га қарши ўйинда фарғоналиклар аввалига 2:0 ҳисобида ортда қолаётганди. Аммо вақт ўтиши билан воқеалар ривожи ўзгарди ва “Нефтчи” 3 та гол уриб ғалабани илиб кетди. Жамоанинг ажойиб футболчиларидан бири Билолхон Тошмирзаев учрашувда ҳисобни тенглаштирувчи гол муаллифи бўлди ҳамда якунда у энг яхши футболчига айланди.

“Динамо” – “Сўғдиёна” – 1:0. Энг яхши футболчи: Жоэл Кожо

“Динамо” клуби “Сўғдиёна”ни медаллардан маҳрум қилди. Самарқандликлар охирги турда мухлисларини ғалаба билан қувонтирмоқчи эди ва буни уддаладилар. Жамоа етакчиси Жоэл Кожо “Динамо” либосида ўзининг охирги учрашувида муҳим голни уриб клубининг ғалабасини таъминлаб берди ва доимгидек у энг яхши футболчи деб топилди. У учрашувдан кейин ишқибозлар билан хайрлашди. Катта эҳтимол билан Кожо келаси йили Эроннинг “Истиқлол” жамоасида тўп суради.

Шуҳратбек Жўраев.